Ղազախստանը չի ճանաչում «Թալիբան» շարժմանը
Ղազախստանի իշխանությունները չեն ճանաչել «Թալիբան» շարժմանը՝ Աֆղանստանի նկատմամբ թալիբների վերահսկողության հաստատումից հետո: Այդ մասին ուրբաթ օրը՝ օգոստոսի 20-ին կայացած ճեպազրույցի ժամանակ հայտարարել է Ղազախստանի արտաքին գործերի փոխնախարար Ական Ռահմետուլինը։
««Թալիբան»-ին մենք չենք ճանաչել։ Ինչպես հայտնի է, երեկ ԱԳՆ-ն պաշտոնական հայտարարություն է արել Աֆղանստանում առկա իրավիճակի վերաբերյալ, որը հրապարակվել է մեր ազգային լրատվամիջոցներում։ Ղազախստանում մենք շարունակում ենք ուշադրությամբ հետևել այդ երկրում իրավիճակի զարգացմանը»,- նշել է Ռահմետուլինը՝ պատասխանելով «Թալիբան» շարժման նկատմամբ Ղազախստանի դիրքորոշման հարցին։
Նա նշել է, որ Ղազախստանն աջակցում է ՄԱԿ-ի Անվտանգության խորհրդի հայտարարությանը՝ ներառական և ներկայացուցչական կառավարության ստեղծման անհրաժեշտության մասին, որը նաև կապահովի կանանց ու փոքրամասնությունների իրավունքների իրացումը, թույլ չի տա այլ երկրների համար սպառնալիք հանդիսացող խմբերի առկայություն և կպահպանի միջազգային իրավունքը։
Ռահմետուլինը պնդում է, որ Ղազախստանը որևէ քաղաքական շփում չունի թալիբների հետ։
«Շփումներ որպես այդպիսին չեն եղել քաղաքական մակարդակում կամ մեկ այլ»,- ընդգծել է նա։
«Թալիբան» շարժման գրոհայիններն օգոստոսի 15-ին, առանց դիմադրության, մտել էին Քաբուլ և մի քանի ժամվա ընթացքում ամբողջական վերահսկողություն հաստատել Աֆղանստանի մայրաքաղաքում։ Աֆղանստանի նախագահ Աշրաֆ Ղանին հայտարարել էր, որ լքում է երկիրը, որպեսզի խուսափի արյունահեղությունից։ Հանրապետության փոխնախագահ Ամրուլա Սալեհը հայտարարել է, որ երկրի ղեկավարի բացակայության պայմաններում սահմանադրությամբ նա է դառնում նախագահի պարտականությունները կատարող և կոչ արել զինված դիմադրություն ցույց տալ թալիբներին։ Զուգահեռաբար, արևմտյան երկրները սկսել են տարհանել իրենց քաղաքացիներին և դեսպանությունների աշխատակիցներին։
Լուսանկարը՝ Javed Tanveer/AFP
Մեկնաբանել