Կիևում մեկնարկել է «Ղրիմի հարթակ» գագաթնաժողովը
Կիևում մեկնարկել է «Ղրիմի հարթակ» միջազգային գագաթնաժողովը, որի նպատակն Ուկրաինայի նախագահ Վլադիմիր Զելենսկին անվանել է «միջազգային ջանքերի կոորդինացում՝ Ուկրաինայի կազմ Ղրիմի վերադարձի համար»։
Գագաթնաժողովին, ընդհանուր առմամբ, մասնակցում են շուրջ 40 երկրների ներկայացուցիչներ, այդ թվում` Եվրամիության երկրներից, ԱՄՆ-ից, Ճապոնիայից, Ավստրալիայից, Նոր Զելանդիայից, Շվեյցարիայից, Թուրքիայից, Վրաստանից, Մոլդովայից և այլն։ Բացի այդ, գագաթնաժողովին մասնակցում են նաև Եվրամիության և ՆԱՏՕ-ի ներկայացուցիչները։ 13 երկրներ գագաթնաժողովին մասնակցում են պետությունների կամ կառավարությունների ղեկավարների մակարդակով, ևս 17-ը՝ արտաքին գործերի նախարարների կամ փոխնախարարների։
Հայաստանը գագաթնաժողովին չի մասնակցում։ Վրաստանը ներկայացնում է վարչապետ Իրակլի Ղարիբաշվիլին, իսկ Թուրքիան՝ արտաքին գործերի նախարար Մևլյութ Չավուշօղլուն։
Ուկրաինայի իշխանություններն ակնկալում են, որ գագաթնաժողովի արդյունքում կընդունվի հռչակագիր, որի մասնակիցները «կհաստատեն իրենց պատրաստակամությունը` հավատարիմ մնալ Ղրիմի բռնազավթման փորձի չճանաչման քաղաքականությանը»։
Ղրիմը Ռուսաստանի կազմ է անցել 2014 թվականին թերակղզում կայացած հանրաքվեի արդյունքում։ Աշխարհի գրեթե բոլոր երկրները չեն ճանաչում հանրաքվեի լեգիտիմությունը և տեղի ունեցածն անվանում «բռնազավթում»։ ՌԴ իշխանությունները քննադատել են «Ղրիմի հարթակի» անցկացման գաղափարը՝ այն անվանելով հակառուսական միջոցառում։
Լուսանկարը՝ Reuters գործակալության
Մեկնաբանել