Ալժիրը խզում է դիվանագիտական հարաբերությունները Մարոկկոյի հետ
Ալժիրը խզում է դիվանագիտական հարաբերությունները հարևան Մարոկկոյի հետ։ Այդ մասին հայտարարել է Ալժիրի արտաքին գործերի նախարար Ռաթման Լամամրան։ Որպես պատճառ նա նշել է Մարոկկոյի թշնամական գործողությունները։
Այդ երկրին Ալժիրը մեղադրում է բազմաթիվ հանցագործությունների մեջ, ներառյալ ահաբեկչական երկու շարժման աջակցելը, որոնք գործում են Ալժիրի տարածքում։ Խոսքը գնում է Քաբիլիայի ինքնավարության շարժման, որը կասկածվում է Ալժիրի հյուսիսում անտառային հրդեհների կազմակերպման մեջ և իսլամիստական «Ռաշադ» շարժման մասին։
Ի պատասխան Ալժիրի որոշման, Մարոկկոյի ԱԳՆ-ն հայտարարել է, որ դիվանագիտական հարաբերությունների խզումը «միանգամայն անհիմն է» և հիմնված է «կեղծ» ու «աբսուրդային պատրվակների» վրա։ Միևնույն ժամանակ այդ որոշումը Ռաբաթում համարում են «սպասելի»՝ հաշվի առնելով վերջին շաբաթներին երկու երկրի միջև հարաբերությունների սրման տրամաբանությունը։
Երկու երկրի հակամարտության գլխավոր ասպեկտը համարվում է Արևմտյան Սահարայի խնդիրը։ Այդ երկրի ապագայի վերաբերյալ նրանք ունեն տարբեր տեսակետներ։ Տարաձայնությունների ևս մեկ կետ է նաև Մարոկկոյի և Իսրայելի միջև հարաբերությունների կարգավորումն ու դիվանագիտական հարաբերությունների հաստատումը։
Մերձավորարևելյան հակամարտության ժամանակ Ալժիրն ավանդաբար աջակցում է պաղեստինցիներին։ Բացի այդ, Ռաթման Լամամրան հայտարարել է, որ Մարոկկոյում օգտագործում են իսրայելական տեխնոլոգիաներ՝ ալժիրցի պաշտոնատար անձանց նկատմամբ լրտեսություն իրականացնելու համար։
Լուսանկարը՝ Wikimedia Commons-ից
Մեկնաբանել