Վահան Քերոբյան․ «1988թ․ քարտեզով այդ ճանապարհի որոշ հատվածներ ընկնում են ադրբեջանական ԽՍՀ տարածքում»
Կառավարությունն ամբողջությամբ ընդգրկված է Կապան-Գորիս միջպետական ճանապարհին ստեղված իրավիճակին լուծում տալու գործին։ Այս մասին Կառավարության նիստից հետո հայտնեց էկոնոմիկայի նախարար Վահան Քերոբյանը։
«Անտրամաբանական է, որ բոլորս նետվենք ինչ-որ հարցի լուծման համար, որով զբաղվում են պրոֆեսիոնալ պատասխանատուները: Կարծում եմ, որ հարցը շուտով լուծում կստանա։ Հայաստանի սահմանը սկսվում է Մեղրիից և իրանական մեքենաները Հայաստան մտնելու հետ կապված պրոբլեմ չունեն, ունեն պրոբլեմ Երևան հասնելու հետ կապված»,- ասաց նախարարը։
Քերոբյանը նշեց, որ խնդիրը լուծվում է շրջանցող ճանապարհի միջոցով։
«Իհարկե, էդ ճանապարհը հարմարեցված չէ խոշոր բեռնատարների համար, բայց այդ ճանապարհն աշխատում է, և բեռները անցնում են: Կրկնում եմ՝ շատ մտահոգված ենք և շատ անհանգստացած ենք այդ ճանապարհի փակմամբ և ամեն ինչ անում ենք, որպեսզի օր առաջ այդ ճանապարհը բացվի։ Ինչքանով ես եմ տեղյակ, հիմա ինտենսիվ բանակցություններ են գնում Հայաստանի, Ռուսաստանի և Ադրբեջանի լիազորված անձանց միջև, որպեսզի այդ ճանապարհը շուտափույթ բացվի»,- տեղեկացրեց էկոնոմիկայի նախարարը։
Վահան Քերոբյանի խոսքով՝ Կապան-Գորիս ճանապարհի որոշ հատվածներ ԽՍՀՄ սահմաններով եղել են ադրբեջանական ԽՍՀ տարածքում․
«1988 թվականի քարտեզով` այն Սովետական Միության սահմանները, որոնք եղել են մինչև ԽՍՀՄ փլուզումը, համաձայն էդ սահմանների՝ այդ ճանապարհի որոշ հատվածներ ընկնում են ադրբեջանական ԽՍՀ տարածքում»,- եզրափակեց նա։
Լրագրողի հարցին՝ արդյոք 1923, 1924 մինչև 1930-ականների քարտեզները նախարարին ծանոթ չե՞ն, Քերոբյանը պատասխանեց․ «Չէ՛, ես դրա մասնագետը չեմ»։
Մեկնաբանել