Ալիևի կարծիքով` ղարաբաղյան հակամարտությունը երբեք չէր լուծվի խաղաղ ճանապարհով
Հետպատերազմական ժամանակաշրջանը և միջազգային ուժերի գործողությունները վկայում են, որ ղարաբաղյան հակամարտությունը երբեք չէր լուծվի բանակցությունների ճանապարհով։ Azertac գործակալության փոխանցմամբ` այդ մասին Շուշիում հայտարարել է Ադրբեջանի նախագահ Իլհամ Ալիևը։
«Բանակցային գործընթացը ձգվում էր գրեթե 30 տարի, սակայն չէր տալիս որևէ արդյունք։ Իրադարձությունների ներկայիս ընթացքը, ղարաբաղյան երկրորդ պատերազմի ժամանակաշրջանը և միջազգային ուժերի գործողությունները ցույց են տալիս, որ այդ հարցը երբեք իր լուծումը չէր գտնի բանակցությունների ճանապարհով»,- նշել է Ալիևը։
Ադրբեջանի նախագահն այն կարծիքին է, որ միջազգային հանրությունը փորձում էր սառեցված հակամարտությունը մատուցել որպես այլընտրանք չունեցող տարբերակ։ «Մենք միանգամայն այլ կարծիք ունեինք, և ես դա երբեք չեմ թաքցրել։ Ես ասում էի, որ եթե հարցը չլուծվի խաղաղ ճանապարհով, մենք ռազմական ճանապարհով կվերականգնենք մեր տարածքային ամբողջականությունը»,- հավելել է նա։ Ալիևը նաև պնդել է, որ ադրբեջանական կողմը հասել է իր նպատակին՝ նշելով, որ ՄԱԿ-ի կանոնադրությունը, Անվտանգության խորհրդի բանաձևերը տվել էին իրենց այդ իրավունքը։
Լուսանկարը՝ Ադրբեջանի նախագահի մամուլի ծառայության
Մեկնաբանել