Օգոստոսի 31-ին «Մուդիս» միջազգային վարկանիշավորման կազմակերպությունը հրապարակեց հերթական զեկույցը, որով Հայաստանին տրված վարկանիշը մնացել է  նույնը՝ ընթացիկ վարկանիշը սահմանելով Ba3, իսկ հեռանկարը կայուն է։ Այս մասին կառավարության սեպտեմբերի 2-ի հերթական նիստին հայտնեց փոխվարչապետ Սուրեն Պապիկյանը։ Փոխվարչապետը խնդրեց Էկոնոմկիայի նախարար Տիգրան Խաչատրյանին անդրադառնալ զեկույցին։

 «Մուդիս»-ը վարկանիշների, հետազոտությունների և ռիսկերի վերլուծության առաջատար կազմակերպություն է։ Վարկանիշավորման գործընթացն իրականացվում է բաց տվյալների և տարբեր կառույցների տրամադրած տեղեկությունների հիման վրա։ Կազմակերպության հետազոտությունները հնարավորություն են տալիս նաև պատկերացում կազմել համաշխարհային շուկայի պարտքերի մասին։

«Մուդիս»-ն իրականացնում է երկարաժամկետ պարտքերի վարկանիշի գնահատում՝ «C»-ից «Aaa» միջակայքում, որտեղ «C»-ն ամենացածր վարկանիշն է, «Aaa»-ն՝ ամենաբարձր։

Ba3/BB- պարտատոմսերի տոկոսադրույքն է, որը տրվում է ընդհանուր առմամբ սպեկուլյատիվ բնույթ կրող պարտքային գործիքներին: Այսինքն, Ba3 գնահատվածները համարվում են «սպեկուլյատիվ տարրեր պարունակող» և «էական վարկային ռիսկ» ունեցողներ։

«Հաշվի առնելով, որ «Մուդիսի» կողմից նախորդ գնահատումը կատարվել էր 2018 թվականին, որից հետո 2020-ին COVID-ի համավարակի տարածման և պատերազմի հետևանքով Հայաստանի տնտեսության համար ի հայտ էին եկել էական տնտեսական ռիսկեր, «Մուդիսի» այս գնահատմամբ՝ արձանագրվում է նման ռիսկերի նկատմամբ Հայաստանի տնտեսության դիմակայունության բարձրացումը»,- նշեց նախարարը։

Ըստ Տիգրան Խաչատրյանի՝ զեկույցում ընդգծվում է, որ Հայաստանի կառավարության տնտեսական քաղաքականությունն այդ տեսանկյունից արդյունավետ է։

«Նշվածը շատ կարևոր ազդակ է միջազգային ներդրողների համար, քանի որ վերահաստատում է Հայաստանի տնտեսական աճի կայուն հեռանկարը և կառավարության տնտեսական քաղաքականության բարենպաստությունը ներդրումների համար։ Այն ընդգծում է նաև Հայաստանի բարձր տնտեսական աճի սպասումների և կառավարության հարկաբյուջետային կարողությունների վերականգնման վերաբերյալ «Մուդիս»-ի կանխատեսումը։ Հրապարակման մեջ կարևոր տեղ են գրավում պետական պարտքի կառավարմանն առնչվող հարցերը։ Չնայած 2020 թվականի արդյունքներով կառավարության պարտք-ՀՆԱ ցուցանիշն աճել է և կազմել 63,5 տոկոս՝ «Մուդիս»-ն այս զեկույցով ընդգծում է, որ կարևորում է առաջիկա 5 տարիների ընթացքում հիշյալ ցուցանիշը 60 տոկոսից նվազեցնելու վերաբերյալ Հայաստանի կառավարության քաղաքականությունը։ «Մուդիս»-ն ընդգծել է այն գործոնները, որոնք կարող են նպաստել Հայաստանի վարկանիշի հետագա բարձրացմանը»,- հայտնեց Տիգրան Խաչատրյանը։

Նախարարը թվարկեց նաև այդ գործոնները, այն է՝ տնտեսության մրցունակության բարձրացմանը և կառավարման ինստիտուտների արդյունավետությանն ուղղված բարեփոխումների արագացում, ընթացիկ հաշվի պակասուրդի բարելավում, այդ թվում՝ օտարերկրյա ուղղակի ներդրումների միջոցով, հարևան երկրների հետ հարաբերությունների լարվածության թուլացում։