Ուկրաինայի նախագահ Վլադիմիր Զելենսկին չի բացառում Ռուսաստանի հետ լայնամասշտաբ պատերազմի հավականությունը։ Այդ մասին նա հայտարարել է ուրբաթ՝ սեպտեմբերի 10-ին՝ պատասխանելով Յալթայի եվրոպական ռազմավարության Yes Brainstorming ֆորումի մոդերատորի հարցին, որն անց է կացվում Կիևում։ 

«Կարծում եմ՝ հնարավոր է։ Այդ թեմայում պոտենցիալ կա… Դա կլինի Ռուսաստանի ամենամեծ սխալը։ Դրանից հետո այլևս գոյություն չի ունենա Ռուսաստան, Ուկրաինա, Բելառուս հարևանություն»,- նշել է Զելենսկին։ 

Խոսելով երկու երկրների հարաբերությունների մասին՝ Ուկրաինայի առաջնորդը քննադատության է ենթարկել մեդիա տիրույթում Մոսկվայի գործողությունները։

«Խնդիրը նրանում է, որ այսօր Ռուսաստանի տեղեկատվական քաղաքականությունը Ուկրաինայի ինքնուրույնության չհարգման մասին է։ Եվ խնդիրը այս կամ այն քաղտեխնոլոգի ընտրության մեջ չէ, որը ներդրել է այդ «ռուսական աշխարհ» երևույթը, այլ նրանում, որ ուկրաինացի ժողովրդի վերաբերմունքը ռուսների նկատմամբ դրանից հետո փոխվել է։ Հարաբերություններ չկան»,- նշել է Զելենսկին։ 

Ուկրաինայի նախագահը հավելել է, որ պատրաստ է հանդիպել Ռուսաստանի նախագահ Վլադիմիր Պուտինի հետ, բայց այդ հանդիպումը պետք է ունենա առարկայական բնույթ։

«Ինձ ավելի շատ հետաքրքրում է՝ արդյոք մենք կարող ենք առարկայական հանդիպում ունենալ։ Ոչ արարողակարգային, ինչպես նա անում է մի շարք երկրների հետ, այլ իրավամբ հանդիպել առավել առարկայական, քան դա եղել է «նորմանդական ֆորմատով» առաջին հանդիպման ժամանակ»,- եզրափակել է Ուկրաինայի նախագահը։

Լուսանկարը՝ Ուկրաինայի նախագահի մամուլի ծառայության