Նախօրեին ոստիկանության Եղեգնաձորի բաժին է դիմել 1960 թ. ծված Արտուշ Հ.-ն և հայտնել, որ նույն օրը՝ ժամը 10:00-ի սահմաններում, դիմակավոր երեք անձինք մուտք են գործել Աղնջաձոր գյուղում գտնվող իր առանձնատուն, կպչուն ժապավենով կապել կնոջ ձեռքերն ու ոտքերը և զենքի սպառնալիքով տնից հափշտակելով մոտ 2 մլն դրամ արժողության ոսկյա զարդեր և 1 մլն 700 հազար դրամ, դիմել են փախուստի: 

Նույն օրը՝ ժամը 11:30-ին, ոստիկանության քրեական հետախուզության գլխավոր վարչության, Վայոց ձորի մարզային վարչության, Եղեգնաձորի բաժնի և ՃՈ 2-րդ սպայական գումարտակի 1-ին վաշտի 2-րդ դասակի ծառայողները, ավազակային հարձակում կատարելու կասկածանքով, ՈԿՖ բանավանի կամրջի վրա կանգնեցրել են «Լեքսուս» մակնիշի ավտոմեքենա, որի վարորդին՝  1987 թ. ծնված Արեգ Ղազարյանին և ուղևորներ՝ 1964 թ. ծնված Արմեն Առաքելյանին, 1984 թ. ծնված Ասատուր Հակոբյանին և 1968 թ. ծնված Բախշի Դավթյանին բերման են ենթարկել ոստիկանություն:

Ավտոմեքենայի զննությամբ հետևի ձախ նստելատեղից հայտնաբերվել է «ԱԿ-74» տիպի առանց խզակոթի ինքնաձիգ, երկու պահունակ, 5.45 մմ տրամաչափի 60 փամփուշտ, Ա. Առաքելյանի մոտից՝ 43 հազար 800 դրամ, 55 կտոր ոսկյա զարդեր, Բ. Դավթյանի մոտից` 1 մլն 201 հազար դրամ, 2 ԱՄՆ դոլար, 5 ոսկյա մատանի և մեկ ոսկյա ժամացույց, Ա. Հակոբյանի մոտից` 13 հազար դրամ և ծալովի դանակ:

Փաստի առթիվ հարուցվել է քրեական գործ ՀՀ քրեական օրենսգրքի 175 հոդվածի 3-րդ մասի 1-ին կետով (ավազակությունը, որը կատարվել է առանձնապես խոշոր չափերով գույք հափշտակելու նպատակով) և 235 հոդվածի 1-ին մասով (ապօրինի կերպով զենք–զինամթերք կրելը, պահելը, օգտագործելը):

«Արեգ Ղազարյանը, Արմեն Առաքելյանը, Ասատուր Հակոբյանը և Բախշի Դավթյանը ձերբակալված են: Կատարվում է նախաքննություն»,- տեղեկացնում է ոստիկանության լրատվության վարչությունը:

Լուսանկարը՝ Գագիկ Շամշյանի