Երկրապահ կամավորականների միության նախագահ, նախկին պատգամավոր Սասուն Միքայելյանը Վազգեն Սարգսյանին քննադատողներին և մասնավորապես իշխող ուժի պատգամավոր Խաչատուր Սուքիասյանին խորհուրդ է տալից հայացք ուղղել վերջինիս անցած ճանապարհին:

«Խաչատուր Սուքիասյանը շատ փոքր մարդ է, որ Վազգեն Սարգսյանին քննադատի, մարդ պետք է իր անցած ուղին, ճանապարհը, Արցախյան առաջին ազատամարտից սկսած հայացք գցի, նոր Վազգեն Սարգսյանից խոսի: Վազգեն Սագսյանը այն մարդն է, որ ազատագրեց 8000 քառ. կմ տարածք, ամբողջ ազգովի ենք ազատագրել, բայց ինքը կարողացավ համախմբել բոլորին»,- «Եռաբլուր» զինվորական պանթեոնում լրագրողների հետ զրույցում ասաց Միքայելյանը:

Սասուն Միքայելյանի խոսքով՝ նահատակները զոհվել են անկախության համար, հետևաբար երկիրը չի կարող անկախության օրը չնշել:

«Եթե չնշենք, այսինքն հանձնվել ենք, անկախություն չկա, մենք պետք է նշենք՝ ի փառս զոհված տղերքի»,- ասաց նա՝ պնդելով, որ անկախ ամեն ինչից պարտավոր եք տոնել այս օրը՝ աշխարհին ցուց տալու, որ ամուր կանգնած ենք:

Միքայելյանը համաձայնեց, որ երկրի անվտանգությանը սպառնացող մարտահրավերներ կան:

«Ես՝ որպես ԵԿՄ նախագահ, իմ գործն եմ անում, հզորացնում եմ, համալրում երիտասարդներով, որ ոտնձգություն լինի սահմանների նկատմամբ, կանգնենք բանակի կողքին»,- ասաց նա: