Ղարիբաշվիլին առաջարկել է ստեղծել Սևծովյան տարածաշրջանում խաղաղ հարևանության նախաձեռնություն
Վրաստանի վարչապետ Իրակլի Ղարիբաշվիլին, սեպտեմբերի 25-ին Նյու Յորքում հանդես գալով ՄԱԿ-ի Գլխավոր Ասամբլեայի 76-րդ նստաշրջանին, առաջարկել է ստեղծել «խաղաղ հարևանության նախաձեռնություն», որը կնպաստի Սևծովյան տարածաշրջանում կայունության ապահովմանը։ Այդ մասին հայտնում է Новости Грузия-ն։
«Աշխարհաքաղաքական տեսանկյունից Սևծովյան տարածաշրջանի կարևորությունն աճում է։ Սև ծովը գտնվում է դինամիկ դիմակայության շախմատային տախտակի առաջնագծում։ Սա հակամարտությունների կառավարման միկրոաշխարհ է։ Եթե այստեղ պահպանվի խաղաղությունն ու կայունությունը, նույնը հնարավոր կլինի հասնել նաև մյուս վայրերում։ Այդ իսկ պատճառով մեր նպատակը հանդիսանում է ողջ տարածաշրջանում խաղաղության և կայունության ապահովումը։ Հարավային Կովկասում մենք առաջարկում ենք խաղաղության նախաձեռնություն՝ մեր տարածաշրջանում կայունության ապահովման համար»,- նշել է Ղարիբաշվիլին։
Ինչպես նշել է Վրաստանի վարչապետը, Թբիլիսին պատրաստ է ընդունել նոր հարթակի շրջանակներում առաջին հանդիպումը։ Ըստ նրա՝ այդ ձևաչափը կօգնի ստեղծել երկխոսություն և կդառնա գործնական որոշում տարածաշրջանային խնդիրների լուծման համար։ Ղարիբաշվիլինհարավկովկասյան հարևաններին և միջազգային գործընկերներին առաջարկել է հարթակին միանալ։
Վերջինս չի հստակեցրել, թե արդյոք Ռուսաստանը ևս կմասնակցի այդ նախաձեռնությանը։ Իր ելույթում նա նշել է, որ այդ երկիրը «ապօրինաբար բռնազավթել է Վրաստանի ինքնիշխան տարածքները և ակտիվորեն խոչընդոտներ ստեղծում եվրոատլանտյան ընտանիքին միանալու Վրաստանի ճանապարհին»։
Լուսանկարը՝ Վրաստանի վարչապետի մամուլի ծառայության
Մեկնաբանել