Նիկոլ Փաշինյանին են ներկայացվել «Կյանքի պուրակի» նախագիծն ու նախատեսվող աշխատանքները
Հանրապետության հրապարակում՝ Պատվո պահակախմբի կողմից պահպանվող ծառերի մոտ, վարչապետ Նիկոլ Փաշինյանին է ներկայացվել Երևանի բուսաբանական այգում հիմնվելիք «Կյանքի պուրակի» նախագիծն ու առաջիկայում նախատեսվող աշխատանքները: Այս մասին հայտնում են վարչապետի աշխատակազմից։
Ըստ աշխատակազմի տարածած հաղորդագրության՝ պուրակում, որն ունենալու է 25-30 հա տարածք, տնկվելու են Արցախյան պատերազմների բոլոր զոհերի կենդանությունն ու ներկայությունը խորհրդանշող ծառեր, իսկ կենաց ծառը կխորհրդանշի բոլոր նահատակներին և հայրենիքին տված նրանց կյանքը:
«Եվ այդ պուրակը լինելու է նրա մասին, որ ահա այդ բոլոր մարդկանց, այս բոլոր մարդկանց՝ Հայաստանի ու Արցախի ապրելու համար են զոհվել նրանք: Եվ Հայաստանի ապրելը, Արցախի ապրելը, խաղաղ ու զարգացող հայոց պետականությունը պիտի դառնա այն հաղթանակը, որ նրանք կերտեցին:
Այստեղ ահա, այս լուսավոր հրապարակի սրտում տեղադրված, հայոց դրոշներով պարուրված և Պատվո պահակախմբի կողմից պահպանվող այդ ծառերը կտեղափոխվեն Բուսաբանական այգի՝ խորհրդանշելով Հայաստանի Հանրապետության պատմության նոր դարաշրջանի մեկնարկը, խաղաղ զարգացման դարաշրջանի մեկնարկը»,- Հայաստանի անկախության 30-ամյակին նվիրված իր ուղերձում նշել էր Նիկոլ Փաշինյանը:
Մեկնաբանել