«Տպավորություն է, որ փողոցի տղաներով կարող են հավաքավել ու խլել ցանկացած լուրջ հասարակական կազմակերպություն»,-իր հրավիրած մամուլի ասուլիսի ժամանակ հայտարարեց Հայաստանի ավտոմոբիլային ֆեդերացիայի` իր իսկ բնորոշմամբ «էքս» նախագահ Մկրտիչ Փիլթոյանը:

Ֆեդերացին գործում է 1996թ .-ից և անդամակցում է համանուն միջազգային ֆեդերացիային:

Բանախոսի խոսքերով, ապօրինի ճանապարհով ֆեդերացիայի նախագահ է ընտրվել «Ապավեն» ընկերության գործադիր տնօրեն Գագիկ Աղաջանյանը, ով ավտոմոբիլային սպորտից ընդհանրապես գաղափար չունի: Աղաջանյանը դարձել է Հայաստանի ավտոմոբիլային ֆեդերացիայի նախագահ ֆեդերացիայի անդամների հավաք-քննարկման ժամանակ կայացված որոշման համաձայն: Ըստ ֆեդերացիայի կանոնադրության` նման որոշում կարող է իրականացվել միայն արտահերթ համագումարի ժամանակ, այն էլ, երբ դրա մասնակիցների թիվը կգերազանցի անդամների ընդհանուր թվի 1/3-ը:

Մկրտիչ Փիլթոյանը տարօրինակ է համարում շուրջ 140 անձանց՝ միանվագ կերպ ֆեդերացիային անդամակցելու պատրաստակամությունը: Օրենքը թույլատրում է ֆեդերացիայի անդամ ընդունել բոլոր ցանկացողներին, սակայն այդպիսի անսպասելի միահամուռ հոսքը, ըստ նրա, միտում ուներ ինչ-որ մարդկանց համար ապահովել 50 և ավելի ձայներով՝ որոշումներ կայացնելու համար:

Փիլթոյանն այս ամենի մեջ քաղաքական ենթատեքստ է տեսնում, և կարծում է, թե ինչ-որ ուժեր, տիրանալով ավտոմոբիլային ֆեդերացիային, ցանկանում են քաղաքական դիվիդենտներ շահել նախընտրական շրջանում: Սակայն «էքս» նախագահին հայտնի չէ, թե դրանք ինչ ուժեր են, և ինքը տեղյակ չէ նույնիսկ «Ապավեն»-ի քաղաքական դիրքորոշման մասին:

Մկրտիչ Փիլթոյանը դիմում է ներկայացրել արդարադատության նախարարություն՝ խնդրելով ամհիմն համարել ՀԱՖ-ի անունից հանդես եկող նոր կառույցի գործունեությունը: