Արարատ Միրզոյան. «Ուզում եմ ողջունել Իրանի դիրքորոշումը՝ մեր սահմանների անձեռնմխելիության վերաբերյալ»
Հայաստանի արտաքին գործերի նախարար Արարատ Միրզոյանը դրական է գնահատում իր այցն Իրանի Իսլամական Հանրապետություն, իսկ գործընկեր պաշտոնյայի հետ հարաբերությունները` ջերմ և բարեկամական: Այս մասին խորհրդարանում Ազգային ժողով-Կառավարություն հարցուպատասխանին ասաց Միրզոյանը` արձագանքելով «Քաղաքացիական պայմանագիր» խմբակցության պատգամավոր Մարիա Կարապետյանի հարցին:
Ըստ Արարատ Միրզոյանի` գործընկերոջ հետ հանդիպմանը փաստել են, թե չկա և չի էլ կարող լինել «Զանգեզուրի միջանցքի» հարց:
«Այսինքն՝ ըստ էության այդ խոսակցության բացակայության վերաբերյալ: Փաստել ենք, որ չկա այդպիսի թեմա և չի կարող լինել»,- ասաց նա:
Երկու երկրի ԱԳ նախարարները հանդիպմանը քննարկել են երկկողմ հարաբերություններին առնչվող մի շարք հարցեր:
«Ուզում եմ նաև ասել, որ այս այցն ու մեր խոսակցությունը վերաբերել է ոչ միայն երկկողմ հարաբերություններին, այլև տարածաշրջանային նշանակություն է ունեցել և շատ կոնկրետ համատեքստ: Ես ողջունել եմ և կրկին ուզում եմ ողջունել Իրանի դիրքորոշումը՝ մեր սահմանների անձեռնմխելիության վերաբերյալ, և ընդհանրապես, այն բոլոր դրական ազդակները, որ ստանում ենք այս առնչությամբ»,- ասաց Միրզոյանը:
Մեկնաբանել