ՔՏՀԱ տեսչական մարմինը էներգետիկայի և էներգասպառման բնագավառում 2021 թվականի առաջին կիսամյակում իրականացրել է 56 ստուգում և 36 վերստուգում։

56 ստուգումից 9-ը կատարվել է Երևանում, 6-ը՝ Գեղարքունիքում, 3-ը՝ Արագածոտնում, 10-ը՝ Սյունիքում, 5-ը՝ Արմավիրում, 6-ը՝ Շիրակում, 4-ական Լոռիում և Կոտայքում, 1-ը Տավուշում, 3-ը Վայոց ձորում և 5-ը Արարատում։

36 վերստուգումից 6-ը կատարվել է Կոտայքում, 3-ը՝ Արագածոտնում, 2-ը՝ Տավուշում, 2-ը՝ Արարատում, 6-ը՝ Արմավիրում, 10-ը՝ Շիրակում, 5-Սյունիքում և 2-ը Լոռիում։

Ստուգումների արդյունքում արձանագրվել է 715 խախտում, որից 43-ը՝ կատարվել է  Երևանում, 98-ը՝ Գեղարքունիքում, 62-ը՝ Արագածոտնում, 198-ը՝ Սյունիքում,  64-ը՝ Արմավիրում, 25-ը՝ Շիրակում, 67-ը Լոռիում և 25-ը Կոտայքում, 24-ը Տավուշում, 55-ը Վայոց ձորում և 54-ը Արարատում։

48 տնտեսավարող սուբյեկտներում կամ դրանց մասնաճյուղերում Տեսչական մարմնի մասնագետների կողմից կատարված ստուգումների արդյունքում գրանցվել է 239 խախտում, ինչը կազմում է բացահայտված բոլոր խախտումների 33․4%-ը։

Հիմնական խախտումները վերաբերում են․

• գազի տնտեսության շահագործման, սպասարկման և վերանորոգման հատուկ հրահանգների բացակայությունը – 27 դեպք,
• գազավտանգավոր աշխատանքներ իրականացնող աշխատակիցների, այդ թվում՝ նաև եռակցողների, գիտելիքների ստուգումներ չանցկացնելը կազմակերպության ղեկավարի հրամանով ստեղծված հանձնաժողովի կողմից` պետական վերահսկողության իրավասություն ունեցող մարմնի ներկայացուցչի մասնակցությամբ – 26 դեպք,
• կազմակերպության գազի տնտեսությունները շահագործող ինժեներատեխնիկական անձնակազմի (ԻՏԱ), գազավտանգավոր աշխատանքներ իրականացնող ԻՏԱ, գազամատակարարման օբյեկտների շինարարությունն իրականացնող շինմոնտաժային կազմակերպությունների ԻՏԱ գիտելիքների ստուգում չանցկացնելը կազմակերպության ղեկավարի հրամանով ստեղծված հանձնաժողովի կողմից` պետական վերահսկողության իրավասություն ունեցող մարմնի ներկայացուցչի մասնակցությամբ – 26 դեպք,
• գազատար խողովակների համապատասխանությունը ազգային ստանդարտներին կամ տեխնիկական պայմաններին հավաստող փաստաթղթերի բացակայությունը – 17 դեպք: 

45  գազաբաշխման և գազասպառման միջին և բարձր ճնշման էներգատեղակայանքներում ստուգումների արդյունքում  բացահայտվել է 352 խախտում։

Հիմնական խախտումներն են.

• Չի կատարվում գազատարի տեխնիկական շահագործման պրոֆիլակտիկ պլանային վերանորոգումը (29 դեպք),
• Չի կատարվում գազատարի տեխնիկական շահագործման շրջայցային կամ տեխնիկական սպասարկումը (զննում, կարգաբերում և մասնակի նորոգում) (28 դեպք),
• Առկա չեն գազատարների տեխնիկական սպասարկման աշխատանքների հրահանգներից՝ աշխատանքների կատարման անվտանգ մեթոդները (25 դեպք):

Թվով 11 ստուգման դեպքում՝ 110կվ և բարձր լարման էլեկտրատեղակայանքի` ենթակայանի և բաշխիչ սարքվածքի տեխնիկական ստուգումների արդյունքում  բացահայտվել է 91 խախտում։

Հիմնական խախտումներն են.

• Առկա չեն բաշխիչ սարքերի տարածքի բնահողի հաղորդականության մասին տվյալները (7 դեպք),
• Հողակցող սարքվածքների տեղակայումից, վերակառուցումից և հիմնական նորոգումից հետո, ոչ պակաս, քան 6 տարին մեկ, չեն կատարվում հպման լարումների չափումներ (6 դեպք),
• Կարգագրով աշխատելիս չի ձևակերպվում նպատակային հրահանգավորումը, առաջնային թույլտվության նպատակային հրահանգավորման գրանցման մատյանում (4 դեպք),
• Սարքին վիճակում չեն ԲՍ-ի տարածքում կոպճային լցվածքները, յուղահեռացման սարքվածքները (4 դեպք),
• Չի պահպանվում էլեկտրակայանքների բանալիների պահպանման և հաշվառման կարգը (4 դեպք)։

Ստուգումների և վերստուգումների արդյունքում կազմվել և տնտեսավարող սուբյեկտներին է տրամադրվել  պարտադիր կատարման միջոցառումները և դրանց կատարման ժամանակացույցը սահմանող 71 կարգադրագիր։

Էներգետիկայի և էներգասպառման բնագավառում 2021 թվականի 1-ին կիսամյակում 36 տնտեսավարող սուբյեկտների օբյեկտներում արված վերստուգումներից պարզվել է, որ արձանագրված 299 խախտումից վերացվել  է 193-ը։ 

ՀՀ տարածքում տեղակայված 6 կՎ և բարձր լարման էլեկտրաէներգետիկական և միջին ու բարձր ճնշման գազամատակարարման համակարգերում՝ տնտեսվարող սուբյեկտների դիմումների հիման վրա, նոր կառուցված և վերակառուցված էներգատեղակայանքներում 2021 թվականի 1-ին կիսամյակի ընթացքում իրականացվել է 665 տեխնիկական ստուգում, որից 353 էլեկտրաէներգետիկական և 312 գազամատակարարման համակարգերում:Նշված ժամանակահատվածում ստուգված տնտեսավարող սուբյեկտներից մեկին տրվել է թերությունների բացակայության մասին տեղեկանք, իսկ վերստուգումների արդյունքում՝ 20 տեղեկանք, որից 8-ը՝ Շիրակի մարզում, 4-ը՝ Կոտայքի, 3-ը Սյունիքում, 2-ը Արագածոտնի և մեկական՝ Տավուշի, Արարատի և Արմավիրի մարզերում։

Արդյունքում տրվել է 547 գործարկման եզրակացություն, իսկ թվով 118 տեղակայանքների գործարկումներ՝ նախագծի և տեխնիկական կանոնակարգերի պահանջներին անհամապատասխանության, թերի շինարարական աշխատանքների և ներկայացված տեխնիկական փաստաթղթերի ոչ ամբողջականության համար ակտ-կարգադրագրերով մերժվել են։

Տեսչական մարմնի կողմից իրականացվել է 1 համակարգային պատահարի մասնագիտական քննություն:2021 թվականի 1-ին կիսամյակում էներգատեղակայանքներում տեղի ունեցած մահվան ելքով 12 պատահարների վերաբերյալ ՀՀ կառավարության սահմանած կարգով կազմակերպվել և իրականացվել է մասնագիտական քննություն, ընդ որում՝ 5-ը  Երևանում, 3-ը Կոտայքի, 2-ը Շիրակի մարզերում, 1-ական Արարատի և Արմավիրի մարզերում: