Տեսանյութեր
Լուսանկարներ
Քարեր են նետել մարդատար էլեկտրագնացքի վրա՝ կոտրելով պատուհանի ապակին
«Հարավկովկասյան երկաթուղի» ՓԲ ընկերությունը տեղեկացնում է, որ հոկտեմբերի 23-ին անհայտ անձինք քարկոծել են Երևան-Գյումրի-Երևան երթուղին սպասարկող էլեկտրագնացքը, ինչի հետևանքով կոտրվել էր էլեկտրագնացքի կողային պատուհաններից մեկի ապակին։ Ուղևորներից ոչ ոք չի տուժել։
Դեպքը տեղի է ունեցել Նորագավիթ-Երևան հատվածում: Երկաթուղու անվտանգության ծառայության աշխատակիցները իրավապահ մարմինների հետ միջոցներ են ձեռնարկում հարձակվողին հայտնաբերելու ուղղությամբ:
Ընկերությունը կրկին զգուշացնում է քաղաքացիներին երկաթուղու երթևեկության անվտանգության նկատմամբ պատասխանատու վերաբերմունքի անհրաժեշտության մասին, ինչպես նաև հիշեցնում է հնարավոր քրեական պատասխանատվության մասին, որը կարող են կրել քաղաքացիները, որոնց անօրինական գործողությունները կարող են սպառնալ երթևեկության անվտանգությանը կամ ուղեւորների կյանքին ու առողջությանը։
Ընկերությունը ծնողներին կոչ է անում բացատրել երեխաներին և դեռահասներին երկաթուղու վրա անպատասխանատու պահվածքի հնարավոր ծանր հետևանքները:
Մեկնաբանել