2022 թ․-ի հունվարի 1-ից կդադարեցվի «Կոշ» և «Հրազդան» քրեակատարողական հիմնարկների գործունեությունը։ Հիմնարկների գործունեության դադարեցման աշխատանքներն իրականացնելու նպատակով հանձնաժողով կստեղծվի։ Որոշման նախագիծն ընգրկված է Կառավարության վաղվա՝ հոկտեմբերի 27-ի նիստի օրակարգում։

Նախագծի հիմնավորմամբ՝ «Հրազդան» քրեակատարողական հիմնարկը նախատեսված է 215 անձի պահման համար (80 կալանավորված անձ և 135 դատապարտյալ)։ Ներկայումս այնտեղ պահվում է շուրջ 157 անձ, որից 69 կալանավորված անձինք և 88 դատապարտյալներ (28 դատապարտյալներ պահվում են փակ, 57 դատապարտյալներ՝ կիսափակ ուղղիչ հիմնարկներում, իսկ 3 դատապարտյալներ՝ կալանք պատժատեսակի համար նախատեսված պայմաններում)։ Հիմնարկի համալրվածությունը կազմում է ընդհանուր լրակազմի շուրջ 73%-ը:

Արդարադատության նախարարությունը գտնում է, որ հիմնարկը խնդրահարույց պահման պայմաններ ունի՝ հարևան, բնակելի շենքերի հետ համեմատությամբ ունի մի քանի մետր հեռավորություն, ինչը նպաստում է արգելված իրերի ներթափանցմանը:  

Բացի այդ, ընդամենը 157 անձի համար նախատեսված աշխատանքների պատշաճ իրականացման համար «Հրազդան» ՔԿՀ-ն ունի 120 հաստիքային միավոր: Միջազգային ընդունված չափանիշներին համապատասխան 1 աշխատակցին «բաժին է ընկնում» 3-4 դատապարտյալ, այնինչ այս դեպքում հավասարակշռությունը, ըստ նախարարության, որոշ չափով խախտված է։

Նախագծով «Կոշ» քրեակատարողական հիմնարկի գործունեության դադարեցման արդյունքում հնարավոր է դառնում լուծել այլ քրեակատարողական հիմնարկների կադրային խնդիրները, ինչպես նաև շուրջ 50 հաստիքով համալրել Պրոբացիայի ծառայության կադրային ռեսուրսը: 

«Կոշ» և «Հրազդան» քրեակատարողական հիմնարկների հաստիքային միավորները կկրճատվեն, և ըստ անհրաժեշտության, կվերաբաշխվեն այլ քրեակատարողական հիմնարկների և Պրոբացիայի ծառայության միջև, իսկ զբաղեցրած պաշտոնից ազատված ծառայողները օրենքով սահմանված դեպքերում կգրանցվեն կադրերի համապատասխան ռեզերվում։

Որոշման ուժի մեջ մտնելուց հետո երկամսյա ժամկետում կկրճատվեն նաև հիմնարկներում տեղակայված՝ «Քրեակատարողական բժշկության կենտրոն» ՊՈԱԿ-ի՝ բժշկական ստորաբաժանման հաստիքները և կհատկացվեն «Արմավիր» քրեակատարողական հիմնար­կում տեղակայված ստորաբաժանմանը։

Մինչև 2022 թվականի հունվարի 1-ը կիրականացվի պատիժ կրող դատապարտյալների տեղաբաշխումն այլ քրեա­կատարողա­­կան հիմնարկներ՝ ըստ վերջիններիս մեկուսացվածության աստիճանի, և պահվող կալանավորված անձանց տեղափոխումը այլ քրեակատարողական հիմնարկներ։

Քրեակատարողական հիմնարկներում ազատությունից զրկված անձանց պահման պայմանների բարելավման և քրեակատարողական հիմնարկների օպտիմալացման շրջանակում հետագայում նախատեսված է փակել նաև «Նուբարաշեն» և «Դատապարտյալների հիվանդանոց» քրեակատարողական հիմնարկները, որի արդյունքում Երևանի տարածքում կկառուցվի շուրջ 1200 լրակազմ ունեցող քրեակատարողական նոր հիմնարկ: 

Այնուհետև «Երևան-Կենտրոն» քրեակատարողական հիմնարկը Ազգային անվտանգության ծառայության վարչական շենքից կտեղափոխվի նախկին «էրեբունի» քրեակատարողական հիմնարկի մասնաշենք, իսկ «Արմավիր» քրեակատարողական հիմնարկում կապահովի կիսաբաց ուղղիչ հիմնարկի համար անհրաժեշտ պայմաններ, որոնք կհամապատասխանեն միջազգային չափանիշներին, և կկառուցվի օդափոխության համակարգ: