ԱՀ քաղաքացիների վիրավորներ և տուժածներ չկան. ԱՀ ԱԱԾ
Այսօր Արցախի Հանրապետության Ազգային անվտանգության ծառայության կողմից տեղեկություններ են ստացվել այն մասին, որ վաղ առավոտյան Ստեփանակերտ-Բերձոր միջպետական ճանապարհին, Շուշի քաղաքի անցակետի մոտ, ադրբեջանցի զինծառայողների սադրիչ գործողություններին ի պատասխան անհայտ անձը պայթուցիկ սարք է նետել անցակետի հատվածում, որից հետո Ստեփանակերտ-Շուշի-Բերձոր միջպետական ճանապարհը երկկողմանի փակվել է։
ԱԱԾ-ն տեղեկացնում է, որ Արցախի Հանրապետության իրավապահ մարմինները ռուսական խաղաղապահ զորակազմի հետ մեկտեղ դեպքի հանգամանքները պարզելու նպատակով իրականացնում են համապատասխան օպերատիվ-հետախուզական և քրեադատավարական միջոցառումներ:
Ստեփանակերտ-Շուշի-Բերձոր միջպետական ճանապարհն այժմ երկկողմանի բաց է, դեպքի արդյունքում ԱՀ քաղաքացիների շրջանում վիրավորներ և տուժածներ չկան։
ԱԱԾ-ն կոչ է անում խուճապի մեջ չընկնել ու պահպանել հանգստություն, զերծ մնալ խուճապ առաջացնող լուրեր տարածելուց և հետևել միայն պաշտոնական լրահոսին։
Հ.Գ. Times.am- ի ֆեյսբուք էջում տեղադրվել է մի տեսանյութ, որտեղ երեւում է՝ ինչպես է մի քաղաքացի դուրս գալիս մեքենայից եւ նռնակ նետում ադրբեջանցի զինվորականների վրա, որից հետո ռուս խաղաղապահները նրան ձերբակալում են։ Սոցցանցերում շրջանառվում է տեղեկություն, որ ձերբակալվածը Շուշիի մերձակայքում ադրբեջանցիների կողմից սպանված Մարտիկ Երեմյանի եղբայրն է, տեղեկությունը դեռեւս հաստատված չէ։
Մեկնաբանել