Իսրայելը թույլատրել է 5-11 տարեկան երեխաներին պատվաստել BioNTech/Pfizer պատվաստանյութով
BioNTech/Pfizer ընկերության արտադրության կորոնավիրուսի դեմ պատվաստանյութը թույլատրվել է կիրառվել Իսրայելում՝ 5-11 տարեկան երեխաների համար։ Այդ մասին գրում է Deutsche Welle-ն՝ հղում անելով Իսրայելի առողջապահության նախարարության որոշմանը։ Ավելի վաղ, նույն ընկերության արտադրության կորոնավիրուսի դեմ պատվաստանյութը թույլատրվել էր կիրառել 12-ից բարձր երեխաների և մեծահասակների համար։
Առողջապահության նախարարության հետ խորհրդակցող փորձագետների խմբի անդամները, որոնց մեջբերում է իսրայելական Haaretz պարբերականը, գրեթե միաձայն եկել են այն եզրակացության, որ «պատվաստանյութի առավելությունները էապես գերազանցում են դրա ռիսկերը»։ Հանձնաժողովը նաև ձայների ճնշող մեծամասնությամբ խորհուրդ է տվել պատվաստել նույնիսկ այն երեխաներին, որոնք արդեն իսկ վարակված են եղել կորոնավիրուսով։
Իսրայելական Keshet 12 հեռուստաընկերության տվյալներով՝ BioNTech/Pfizer-ի՝ երեխաների համար նախատեսված պատվաստանյութը Իսրայել կմատակարարվի մինչև այս տարվա նոյեմբերի 18-ը, ինչը հնարավորություն կտա անմիջապես սկսել ցածր տարիքի երեխաների պատվաստման գործընթացը։
Ինչպես նշում է այդ երկրի առողջապահության նախարարությունը, Իսրայելում համավարակի չորրորդ ալիքն անկում է գրանցում։ Ընդհանուր առմամբ, կորոնավիրուսի համավարակից ի վեր, Իսրայելում գրանցվել է կորոնավիրուսով վարակման 1 337 041 դեպք (+3298 դեպք վերջին մեկ շաբաթվա ընթացքում)։ Ներկայումս բուժում է ստանում 5843 մարդ։ 8140 մարդ էլ մահացել է կորոնավիրուսից։
Նոյեմբերի 14-ի դրությամբ՝ այդ երկրում կորոնավիրուսի պատվաստանյութի առաջին դեղաչափը ստացել է 6 256 219 մարդ (երկրի բնակչության 67 %-ը կամ մեծահասակների 92 %-ը), իսկ երկրորդ դեղաչափը՝ 5 752 941 (բնակչության 62 %-ը կամ մեծահասակների 84 %-ը)։ 4 016 195 մարդ էլ ստացել է պատվաստանյութի երրորդ դեղաչափը (բնակչության 43 %-ը կամ մեծահասակների 59 %-ը)։ Վերջին ամիսներին Իսրայելում պատվաստման տեմպերը սկսել են նվազել։
Լուսանկարը՝ Flash90-ի
Մեկնաբանել