Մայրաքաղաքի կառավարման, ենթակառուցվածքների զարգացման ոլորտներում համաշխարհային բանկի առավել գործուն մասնակցության հնարավորություններին առնչվող հարցեր են քննարկվել Երևանի քաղաքապետ Կարեն Կարապետյանի և Համաշխարհային բանկի ջրի, քաղաքային հարցերի և աղետների կառավարման ոլորտի ղեկավար Վաել Զակուտի հանդիպման ժամանակ:

Համաշխարհային բանկի ներկայացուցիչը, ներկայացնելով իր ղեկավարած ոլորտի հիմնական ուղղությունները, նշել է, որ ցանկացած ոլորտում հաջողության կարելի է հասնել արդյունավետ կառավարման, մասնավոր հատվածի հետ ճիշտ համագործակցության պարագայում:

Երևանի քաղաքապետը ներկայացրել է քաղաքային տնտեսության կառավարման իր մոտեցումները և ընդգծել, որ մայրաքաղաքի զարգացմանն ուղղված ծրագրերի  իրականացման գործում քաղաքապետարանը պատրաստ է համագործակցել ինչպես Համաշխարհային բանկի, այնպես էլ ֆինանսական այլ կառույցների հետ.

«Համաշխարհային բանկից մենք ակնկալում ենք ոչ միայն խորհրդատվական, այլև ներդրումային աջակցություն»,– նշել է քաղաքապետը՝ մատնանշելով այն ոլորտները, որտեղ առկա են համատեղ ծրագրերի իրականացման հնարավորություններ:

Վաել Զակուտը նշել է, որ Համաշխարհային բանկը տարբեր հիմնադրամների և վարկային կառույցների միջոցով ծրագրեր է իրականացնում քաղաքային իշխանությունների հետ՝ տրամադրելով ոչ միայն խորհրդատվական, այլև ծրագրավորման, ներդրումային աջակցության  ծառայություններ:

Ներդրումային հնարավորություններն ուսումնասիրելու նպատակով Երևանի քաղաքապետարանը Համաշխարհային բանկին կներկայացնի զարգացման ծրագրերի առաջարկությունների փաթեթը: Այս մասին հայտնում են քաղաքապետարանի Տեղեկատվության և հասարակայնության

 հետ կապերի վարչությունից: