Իսրայելում մի քանի օր է, ինչ նորությունների գլխավոր թեման դարձել է պաշտպանության նախարար Բենի Գանցի շուրջ ծավալվող պատմությունը։ Պարզվում է՝ նրա տան աշխատակիցը կապ ունի Իրանի հատուկ ծառայությունների հետ։ Վերջինս աշխատել է որպես հավաքարար և իրականացրել տնտեսության հետ կապված այլ աշխատանքներ։ Կալանավորվել է՝ Իրանի օգտին լրտեսություն անելու մեղադրանքով։

Տղամարդու անունը Օմրի Գորեն-Գորոխովսկի է, որին Բենի Գանցն ու նրա կինն աշխատանքի են վերցրել ծանոթների խորհրդով։ Համաձայն առկա տեղեկատվության՝ Օմրի Գորեն-Գորոխովսկին ու նրա կինը շաբաթական երկու անգամ կենցաղային բնույթի աշխատանքներ են կատարել Իսրայելի պաշտպանության նախարարի տանը։ Գանցն անձամբ է վճարել ամուսիններին՝ գումարը փոխանցելով bit հավելվածի միջոցով։ 

Ընդորում, Գորեն-Գորոխովսկին Գանցերի տանը սկսել է աշխատել մինչև նրա պաշտպանության նախարար նշանակվելը։ Սակայն անհայտ է, թե արդյոք Շաբակը՝ Իսրայելի հակահետախուզության ծառայությունը կազատվի պատասխանատվությունից անփութության համար, քանի որ, եթե նրա ծառայողները մանրակրկիտ ուսումնասիրեին Գորեն-Գորոխովսկուն, ապա կպարզվեր, որ նա, հինգ անգամ դատապարտվել է կողոպուտի և գողության համար, որից չորսի պարագայում ազատազրկվել է։ 

Օմրի Գորեն-Գորոխովսկին

Իսրայելական լրատվամիջոցները պնդում են, որ Գորեն-Գորոխովսկին, Telegram հավելվածի միջոցով, գտել է իրանական Black Shadow (Սև ստվեր) լրտեսական ալիքը և առաջարկել, որոշակի գումարի դիմաց, լրտեսություն անել՝ վստահեցնելով, որ հեշտությամբ կարող է հասանելիություն ունենալ գաղտնի փաստաթղթերին, որոնք վերաբերում են անվտանգությանը, ինչպես նաև իրանական հետախուզության ներակայացուցիչներին ուղարկել լուսանկարներ Գանցի տնից, աշխատասենյակից, նրա տեխնիկական սարքավորումները և այլն։

Իսրայելական 12-րդ հեռուստաընկերության տվյալներով՝ Black Shadow լրտեսական ցանցի հաքերներից նա պահանջել է 7000 ԱՄՆ դոլար։ Ըստ որոշ աղբյուրների՝ նա նույնիսկ պատրաստ է եղել ստանալ լրտեսական ծրագիր և այն տեղադրել Բենի Գանցի համակարգչում։

Հաքերային խմբի հետ կապ հաստատելուց մի քանի շաբաթ անց նա ձերբակալվել է։ Շաբակում պնդում են, որ Գորեն-Գորոխովսկին հասանելիություն չի ունեցել պաշտպանության նախարարության գաղտնի փաստաթղթերին և չէր կարող պետական գաղտնիք հանդիսացող բովանդակություն փոխանցել այլ անձանց։ 

Իսրայելում քննադատությունների տարափի տակ է հայտնվել Շաբակը, որի 730 անունը կրող ստորաբաժանումը, ի թիվս այլ պարտականությունների, պատասխանատու է նաև Գանցի և նրա ընտանիքի անձնական անվտանգության համար։ Այն պետք է պարզեր բոլոր անձանց վերաբերյալ տվյալները, որոնք մուտք ունեն նախարարի տուն։ Նույն կառույցի մեկ այլ ստորաբաժանում, որը կրում է «Անվտանգության ֆիլտրում» անվանումը, նույնպես հավաքում է տեղեկատվւոթյուն և հենց նա պետք է տար վերջնական եզրակացությունը. արդյոք այս կամ այն անձին կարելի է աշխատել երկրի առաջին դեմքերի մոտ։

Արդյունքում, ըստ իսրայելական 12-րդ հեռուստաընկերության, երկու ստորաբաժանումները չեն կողմնորոշվել, թե որը որի պատասխանատվության գոտին է, և Գորենը, պաշտպանության նախարարի տանն աշխատանքի անցնելուց առաջ, ընդհանրապես չի անցել անվտանգության ստուգում։

Օմրի Գորեն-Գորոխովսկու փաստաբան Գալ Վոլֆը պնդում է, որ մեղադրյալը մտադրություն չի ունեցել վնաս հասցնել պետական անվտանգությանը, իսկ նրա արարքների մոտիվը ֆինանսական է եղել։ «Նա չէր պատկերացնում, որ ամեն ինչ կհասնի նրան, ինչին հասել է։ Նա պատմում է, որ այդ ամենն արել է ֆինանսական դժվարությունների ֆոնին և մտադրություն չի ունեցել վնաս հասցնել պետական անվտանգությանը։ Նա հասանելիություն չի ունեցել գաղտնի նյութերին և փաստաթղթերին»,- նշում է փաստաբանը։

Լուսանկարում՝ Իսրայելի պաշտպանության նախարար Բենի Գանցը/profimedia