Պուտինը ցավում է, որ ԼՂ-ում մինչ օրս միջադեպեր են լինում և զոհեր գրանցվում
Ռուսաստանի նախագահ Վլադիմիր Պուտինը հայտարարել է՝ ցավում է, որ Լեռնային Ղարաբաղում մինչ օրս միջադեպեր են լինում, որոն հետեւանքով զոհեր են գրանցվում։ Այդ մասին Սոչիում Պուտինը հայտարարել է Ադրբեջանի նախագահ Իլհամ Ալիևի հետ հանդիպման ժամանակ։
«Ցավոք, կան խնդիրներ, կան միջադեպեր։ Ցավոք, մինչ օրս այդ ամենն առանց զոհերի չի լինում»,- նշել է Ռուսաստանի առաջնորդը՝ ընդգծելով, որ տարածաշրջանում իրավիճակի կարգավորման շուրջ զրույցը նպատակահարմար է շարունակել եռակողմ ձևաչափով։ «Մեզ որոշ ժամանակ անց կմիանա Հայաստանի վարչապետը, և մենք կշարունակենք այդ քննարկումը»,- հավելել է Պուտինը։
Իր խոսքում նա նաև ընդգծել է Լեռնային Ղարաբաղում իրավիճակի կարգավորման մեջ ռուս խաղաղապահների դրական դերը։ «Ինչ վերաբերում է ղարաբաղյան կարգավորմանը <...>, այստեղ մեր խաղապահները, ինձ թվում է, դրական դեր ունեն, արդյունավետորեն գործում է հրադադարի ռեժիմի պահպանման վերահսկողության ռուս-թուրքական կենտրոնը»,- նշել է նա։
Պուտինի գնահատմամբ՝ անհրաժեշտ է քննարկել, թե ինչ է արդեն արվել և ինչ դեռևս պետք է արվի, «որպեսզի նման բան ոչ միայն չառաջանա, այլև հակառակը՝ ստեղծվեն պայմաններ իրավիճակի հանդարտեցման և տարածաշրջանում իրավիճակի այն որակի զարգացման, որը հնարավորություն կտա մարդկանց հանգիստ ապրել, իսկ երկրներին՝ զարգանալ»։
Ռուսաստանի նախագահը նաև նշել է, որ նոյեմբերի 26-ի կենտրոնական հանդիպումը կլինի Ռուսաստանի, Ադրբեջանի և Հայաստանի առաջնորդների՝ Լեռնային Ղարաբաղում ստեղծված իրավիճակի կարգավորման շուրջ եռակողմ հանդիպումը։
Հիշեցնենք, որ մի քանի ժամ առաջ Սոչի է ժամանել նաև Հայաստանի վարչապետ Նիկոլ Փաշինյանը։ Նա ևս երկկողմ հանդիպում կունենա Ռուսաստանի նախագահի հետ, որին կհաջորդի եռակողմ հանդիպումը։
Լուսանկարը՝ APA գործակալության
Մեկնաբանել