Այսուհետ մեր փրկարարները կարող են օգնության հասնել նաեւ օդից

Այսօր Կոտայքի մարզում ՀՀ ՊՆ առանձին ավիացիոն ուսումնական էսկադրիլիայում կայացավ ՀՀ ԱԻՆ ՀՓԾ հատուկ փրկարարական ջոկատի աէրոմոբիլային խմբի ցուցադրական թռիչքը: Միջոցառմանը ներկա էր արտակարգ իրավիճակների նախարարության ղեկավար կազմը:

Հրշեջ-փրկարարական դեսանտային խմբում ընդգրկված է 23 փրկարար, որից երկուսը` աղջիկ: ՀՀ պաշտպանության նախարարության եւ ՀՀ ԶՈՒ ավիացիայի վարչության աջակցությամբ անցկացված 20-օրյա դասընթացներից հետո հրշեջ-փրկարարները պարաշյուտով մոտ 1000 մ բարձրությունից իրականացրել են մի քանի գործնական թռիչք:

Ցուցադրական ելույթից հետո ԱԻ նախարար Արմեն Երիցյանը շնորհավորել է աերոմոբիլային խմբի անդամներին եւ պարգեւատրել է «Առաջնեկ» շքանշանով: Նախապատրաստական դասընթացներն անցկացնելու համար պատվոգրեր են հանձնվել նաեւ ՀՀ ԶՈՒ ավիացիայի վարչության աշխատակիցներին:

«ՀՀ տարածքն այնպիսին է, որ մենք պետք է կարողանանք բոլոր տեղերում իջեցնել փրկարարներին: Բացի դրանից` սա նաեւ միջազգային չափանիշ է: Օգտվելով առիթից` ուզում եմ շնորհակալություն հայտնել մեր երկարամյա գործընկեր պաշտպանության նախարարությանը` օժանդակության համար»,- ասել է ԱԻ նախարար Արմեն Երիցյանը:

Փրկարարների խոսքերով` այսպիսի հմտություններին տիրապետելը զգալիորեն կարագացնի արձագանքման գործընթացը:

«Ունենալով փրկարարական աշխատանքներ լեռներում` սա օգնության հասնելու ամենաարագ ձեւն է: Եթե նախկինում Քելբաջարի կամ Վարդենիսի լեռներ հասնելու համար մեզ պետք էր 8-10 ժամ, ապա հիմա մենք կարող ենք այնտեղ հասնել րոպեների ընթացքում»,- ասել է Ավետիս Մանուկյանը՝ հատուկ փրկարարական ջոկատի հրամանատարը:

«Վախ, իհարկե, կա, բայց եթե փրկարար ես, պիտի փորձես հաղթահարել վախը»,- ավելացրել է հատուկ փրկարարական ջոկատի փրկարար Վիկտորիա Խաչատրյանը:

Իսկ նրա գործընկեր Համբարձում Վարդումյանը հավելել է. «Մեզ ոգեւորելու համար ուզում եմ շնորհակալություն հայտնել մեր հրահանգիչներին, որոնք գրագետ ձեւով պատրաստեցին մեզ թռիչքներին»:

Ինչպես հայտնում են ԱԻ նախարարության մամլո ծառայությունից, գործընթացը շարունակական է լինելու: Առաջիկայում ԱԻ նախարարությունը կպատրաստի 25 հրշեջ-փրկարարից կազմված երկրորդ աերոմոբիլային խումբը: