Վանաձորի արդեն նախկին քաղաքապետ, «Մամիկոն Ասլանյան» դաշինքի համամասնական ցուցակի համայնքապետի թեկնածու Մամիկոն Ասլանյանը վստահեցնում է` որևէ գործարքի չի գնալու, ընտրվելու պարագայում չի հրաժարվելու պաշտոնից:

Այս մասին լրագրողների հետ զրույցում ասաց Մամիկոն Ասլանյանը՝ քվեարկելուց հետո:

Ընտրվելու դեպքում արդյոք կարող է զիջել համայնքապետի պաշտոնը հարցին ի պատասխան՝ Ասլանյանը հայտարարեց. «Իմ զիջելու տարբերակն ինձ զնդանում փակելն է, ես որևէ մեկին զիջելու բան չունեմ: Էս քաղաքը զիջման ու աճուրդի առարկա չէ»: Նա վստահեցրեց` լինելու է իր ընտրազանգվածի կողքին բոլոր իրավիճակներում` անկախ նրանից, թե ինչ ճնշումներ լինեն իր վրա:

Ասլանյանը բացառեց նաեւ քաղաքական որևէ ուժի հետ համագործակցությունը:

«Ու բացառելու եմ զուտ քաղաքական համագործակցության տեսանկյունից, որովհետև քաղաքական տրամաչափով չեմ մտել այս պրոցեսի մեջ: Մերը աշխատանքային, համայնքային քաղաքականություն է, ու եթե էդ տրամաբանությամբ լինեն թիմեր, որ նույնիսկ էս ընտրապրոցեսում չեն մասնակցում, նույնիսկ նրանց հետ համագործակցության եզրեր ունեմ»,- ասաց նա:

Ինչ վերաբերում է Լոռու մարզպետ Արամ Խաչատրյանի այն մեղադրանքին, թե Վանաձորը Ասլանյանի պաշտոնավարման շրջանում 4 մլրդ դրամ պարտք է կուտակել, Ասլանյանը հակադարձեց` նախ ոչ թե 4 մլրդ, այլ 800 մլն դրամ, և ոչ թե համայնքի պարտքն է, այլ համայնքին են պարտք: «Այդ գումարն էլ Ղազախստան մեքենաների ներկրման գույքահարկի գծով պարտքերն են, ինչպես նաև նախորդ քսան տարիներից կուտակված այլ պարտքեր»,- ասաց թեկնածուն:

Ասլանյանի խոսքով` իր պաշտոնավարման հինգ տարվա ընթացքում համայնքին 200-300 մլն պարտք է վերադարձվել, այդ թվում` նախկին քաղաքապետ Սամվել Դարբինյանն է համայնքին ունեցած 9 մլն դրամ պարտք վերադարձրել, համայնքն էլ իր հերթին տույժ-տուգանքներն է ներել: