Թուրքիան Բելառուսի ամենաբարեկամ երկրներից մեկն է։ Այդ մասին թուրքական TRT հեռուստաընկերությանը տված հարցազրույցում հայտարարել է Բելառուսի նախագահ Ալեքսանդր Լուկաշենկոն, գրում է БелТА-ն։ Լուկաշենկոյի խոսքով՝ երկու երկրների միջև համագործակցությունն զարգանում է մի քանի ուղղություններով, այդ թվում` առևտրատնտեսական ոլորտում։

«Մենք մոտեցել ենք մեկ միլիարդ դոլար առևտրաշրջանառության։ 2020 թվականին եղել է ավելի քան 700 միլիոն դոլար։ Հիմա 2020 թվականի հետ համեմատած առևտրաշրջանառությունն ունի շատ լուրջ աճ»,- նշել է Լուկաշենկոն։

Ինչ վերաբերում է արտաքին քաղաքական փոխգործակցությանը, ապա, ըստ Բելառուսի նախագահի, Բելառուսի ու Թուրքիայի դիրքորոշումները բազմաթիվ հարցերում համընկնում են։

«Միջազգային կազմակերպություններում խնդիրներ չկան։ Մենք աջակցում ենք միմյանց։ Թուրքիան Բելառուսի ամենաբարեկամ երկրներից մեկն է։ Արտաքին գործերի նախարարությունը, դրա ղեկավար Մևլյութ Չավուշօղլուն միջազգային բոլոր հարթակներում աջակցում են Բելառուսին։ Այդպես էլ մենք ենք աջակցում Թուրքիային։ Մեզ համար շատ կարևոր են թուրքական պետության և թուրքական ժողովրդի հետ բարեկամական հարաբերությունները»,- նշել է Բելառուսի նախագահը։ 

Ալեքսանդր Լուկաշենկոյի պնդմամբ՝ ինքը անձնական լավ հարաբերություններ ունի Էրդողանի հետ։

«Ռեջեփ Էրդողանի ցանկացած խնդրանք, անվերապահորեն, եթե դա հնարավոր է, Բելառուսն իրականացնում է։ Նույնն էլ մենք տեսնում ենք Թուրքիայի պարագայում։ Ես ևս մեկ անգամ շնորհակալություն եմ հայտնում Թուրքիայի ղեկավարությանն այն սկզբունքային դիրքորոշման, այն պարկեշտ դիրքորոշման համար, որը նա ցուցաբերում է մեր՝ Բելառուսի նկատմամբ»,- ընդգծել է Լուկաշենկոն։ 

Փախստականների հարցում Լուկաշենկոն սկսել է հաճոյախոսել Թուրքիային ու Էրդողանին։

«Ես կարող եմ ասել, որ դուք ուղղակի հերոսական երկիր եք և ձեր ղեկավարությունն ամենաազնիվն է աշխարհում։ Դուք ձեր երկրի տարածքում պահում եք ավելի քան 4 միլիոն փախստականների։ Դա ստիպում է հարգել ձեզ»,- հավելել է Լուկաշենկոն։ 

Լրագրողի այն հարցին, թե արդյոք Բելառուսի նախագահը համարում է, որ Թուրքիայի նախագահ Ռեջեփ Թայիփ Էրդողանը հանդիսանում է մուսուլմանական աշխարհի առաջնորդ, Լուկաշենկոն պատասխանել է.

«Համարում եմ, թե չեմ համարում Էրդողանին մուսուլմանական աշխարհի առաջնորդ, նա արդեն դարձել է մուսուլմանական աշխարհի համար նշանակալի կերպար։ Նա Թուրքիայում ստեղծել է հզոր կուսակցություն։ Նա ուղենշել է 21-րդ դարում թուրքական պետության և 85 միլիոնանոց թուրքական ժողովրդի զարգացման ճանապարհը։ Նա իրավամբ իրեն իրական առաջնորդի պես է պահում երկրագնդի այն հատվածում, որտեղ գտնվում է։ Մուսուլմանական աշխարհում նա շատ ուժեղ կերպար է և ոչ միայն մուսուլմանականում»,-  եզրափակել է Լուկաշենկոն։

Լուսանկարը՝ Բելառուսի նախագահի մամուլի ծառայության