Մակրոնն ու Պուտինը քննարկել են Լեռնային Ղարաբաղում առկա իրավիճակը
Ֆրանսիայի նախագահ Էմանուել Մակրոնն ու Ռուսաստանի նախագահ Վլադիմիր Պուտինը հեռախոսազրույց են ունեցել, որի ընթացքում քննարկել են Լեռնային Ղարաբաղում առկա իրավիճակը և Հայաստանի, Ռուսաստանի ու Ադրբեջանի ղեկավարների եռակողմ հայտարարությունների կատարման ընթացքը։ Այդ մասին նշվում է Կրեմլի տարածած հաղորդագրության մեջ։
Պուտինը Մակրոնին տեղեկացրել է Ադրբեջանի և Հայաստանի ղեկավարների հետ եռակողմ հանդիպման հիմնական արդյունքները, որը կայացել էր նոյեմբերի վերջին, Սոչիում։ «Մանրամասն անդրադարձ է կատարվել ղարաբաղյան հակամարտության կարգավորման գործընթացին։ Վլադիմիր Պուտինը տեղեկացրել է Սոչիում նոյեմբերի 26-ին Ռուսաստանի, Ադրբեջանի և Հայաստանի առաջնորդների հետ եռակողմ հանդիպման հիմնական արդյունքները, որը նվիրված էր Լեռնային Ղարաբաղի վերաբերյալ 2020 թվականի նոյեմբերի 9-ի եռակողմ հայտարարության մեկ ամյակին»,- նշվում է հաղորդագրության մեջ։
Կրեմլի տվյալներով՝ Ռուսաստանի նախագահը ֆրանսիացի գործընկերոջը ներկայացրել է տարածաշրջանում հրադադարի ռեժիմի պահպանման, փախստականների վերադարձի, առևտրատնտեսական և տրանսպորտային կապերի վերականգնման գործընթացը։
Հեռախոսազրույցի ընթացքում, ըստ Կրեմլի հաղորդագրության, ընդգծվել է նաև Եվրոպական խորհրդի նախագահ Շառլ Միշելի հետ Նիկոլ Փաշինյանի և Իլհամ Ալիևի հանդիպման կարևորությունը։ Կողմերն այն որակել են որպես օգտակար։ «Պաշտպանվել է ԵԱՀԿ Մինսկի խմբի համանախագահների գծով աշխատանքների ակտիվացման նպատակահարմարությունը»,- հավելել է Կրեմլի մամուլի ծառայությունը։
Լեռնային Ղարաբաղից զատ, Մակրոնն ու Պուտինը քննարկել են նաև Ուկրաինայի և ՆԱՏՕ-ի հետ կապված հարցեր։
Լուսանկարը՝ РИА Новости-ի
Մեկնաբանել