Եվրոպական խորհրդի նախագահ Շառլ Միշելը ողջունել է Ադրբեջանի որոշումը Հայաստանին վերադարձնել 10 հայ գերիներին։ Այդ մասին Միշելը գրառում է արել թվիթերյան իր միկրոբլոգում։ 

«Ջերմորեն ողջունում եմ Ադրբեջանի կողմից 10 հայ գերիների փոխանցումը, որն իրականացվել է Ադրբեջանի նախագահի և Հայաստանի վարչապետի հետ բանակցությունների արդյունքում»,- նշել է Միշելը։

Warmly welcome Baku’s release of 10 Armenian detainees in follow up to discussions with @azpresident and @NikolPashinyan

An important humanitarian gesture demonstrating the mutual will to strengthen confidence as discussed in Brussels.

EU facilitated transfer to Yerevan. https://t.co/L8McDj4oUe

— Charles Michel (@eucopresident) December 19, 2021

Եվրոպական խորհրդի նախագահը գերիներին Հայաստանին վերադարձնելն անվանել է «կարևոր հումանիտար ժեստ, որը ցույց է տալիս վստահության ամրապնդման փոխադարձ կամքը»։ Միշելի ընդգծմամբ՝ Եվրամիությունը նպաստել է Երևանին գերիների վերադարձին։ 

Թվիթերյան գրառումից երևում է, որ գերիներին ուղեկցել է Հարավային Կովկասում և Վրաստանի ճգնաժամի հարցերով ԵՄ հատուկ ներկայացուցիչ Տոլվո Կլաարը։ 

Հիշեցնենք, որ կիրակի օրը՝ դեկտեմբերի 19-ի առավոտյան, հայտնի դարձավ, որ Ադրբեջանը Հայաստանին է փոխանցել 10 հայ գերու, որոնք գերեվարվել էին 2021 թվականի նոյեմբերի 16-ին Հայաստանի արևելյան սահմանի Սյունիքի հատվածում տեղի ունեցած մարտական գործողությունների արդյունքում։ 

Լուսանկարը՝ Olivier Hoslet/AFP via Getty Images