Դեկտեմբերի 21-23-ն աշխատանքային այցով Հայաստան կժամանի Հավաքական անվտանգության պայմանագրի կազմակերպության գլխավոր քարտուղար Ստանիսլավ Զասը, որի ընթացքում նա հանդիպումներ կունենա ՀՀ բարձրագույն ռազմաքաղաքական ղեկավարության հետ և կքննարկի ՀԱՊԿ պատասխանատվության գոտում առկա իրավիճակը։ Այդ մասին նշվում է ՀԱՊԿ տարածած մամլո հաղորդագրության մեջ։

«Այցի ընթացքում նախատեսված է հանդիպում ՀԱՊԿ հավաքական անվտանգության խորհրդի նախագահ, Հայաստանի վարչապետ Նիկոլ Փաշինյանի հետ։ ՀԱՊԿ գլխավոր քարտուղարը նրա հաստատմանը կներկայացնի ՀԱՊԿ Հավաքական անվտանգության խորհրդի 2021-ի սեպտեմբերի նստաշրջանի որոշումների և Հայաստանի նախագահության շրջանում ՀԱՊԿ գործունեության գերակա ուղղությունների իրականացման նախագծերը»,- նշվում է հաղորդագրության մեջ։ 

Նախատեսվում է, որ Ստանիսլավ Զասը բանակցություններ կվարի նաև ՀՀ արտաքին գործերի նախարար Արարատ Միրզոյանի, պաշտպանության նախարար Սուրեն Պապիկյանի և Անվտանգության խորհրդի քարտուղար Արմեն Գրիգորյանի հետ։

Լուսանկարը՝ ՀՀ կառավարության մամուլի ծառայության