![](/static/articles/01/39/45/l-584rhG3hDo.jpg)
ՀՀԿ-ի «համեստ» մարզպետները
Սյունիքի եւ Կոտայքի մարզպետներ' ՀՀԿ անդամ Սուրիկ Խաչատրյանն ու Կավալենկո Շահգալդյանը ՀՀԿ-ի համամասնական ցուցակով պատգամավորության թեկնածուներ են: Սուրիկ Խաչատրյանին ՀՀԿ-ն վստահել է ցուցակի 60-րդ, իսկ Կավալենկո Շահգալդյանին` 69-րդ տեղը:
Մամուլը բազմիցս գրել է երկու մարզպետների ունեցվածքի, հանքերի մասին, սակայն ԿԸՀ ներկայացրած նրանց գույքի եւ եկամուտների հայտարարագրից տպավորություն է ստեղծվում, թե նրանք «չոր» աշխատավարձով ապրող մարդիկ են: Իհարկե, մարզպետները փոքր ինչ անդրադարձել են իրենց ունեցվածքին, սակայն հաշվի առնելով մամուլում նրանց ունեցվածքի մասին բազմիցս գրված տեղեկությունները, կարծում ենք, ՀՀԿ-ական մարզպետները հայտարարագրելիս զգուշավորություն են ցուցաբերել:
Օրինակ` ո՞վ է հավատում, որ Սյունիքի մարզում ամենակարող մարզպետ Սուրիկ Խաչատրյանը, բացի իր 2 միլիոն 277 հազար 685 դրամ աշխատավարձից, այլ եկամուտ չունի: Առավել եւս իրականությանը մոտ չէ, որ մարտի 1-ի դրությամբ մարզպետը գոնե 1 դրամ չի ունեցել: Նա նույնիսկ ավտեմեքենա չի հայտարարագրել:
Սուրիկ Խաչատրյանը միայն նշել է իր անշարժ գույքի մասին` մեկ բնակելի տուն Երեւանի Տերյան փողոցում, բնակելի տուն Կապանում, ինչպես նաեւ մեկական շինություն եւ հողամաս Երեւանում: Այսքանն է հայտարարագրել մարզպետը: Նրա ունեցվածքին մանրամասնորեն կանդրադառնանք առաջիկայում:
Ոչ պակաս կարողությունների տեր Կոտայքի մարզպետ Կավալենկո Շահգալդյանի հայտարարագրից էլ կարելի է եզրակացնել, որ նա կամ տնփեսա է գնացել եւ ապրում է կնոջ տանը, կամ էլ երեխաների բնակարանում է ապրում, քանի որ նա ոչ մի տեսակի անշարժ գույք չունի: Կ. Շահգալդյանը ավտոմեքենա եւս չի հայտարարագրել:
Եկամուտների բաժնում նշել է միայն 2 միլիոն 517 հազար 88 դրամ աշխատավարձը, իսկ մարտի 1-ի դրությամբ պատգամավորության թեկնածու մարզպետը ունեցել է 6 միլիոն դրամ եւ 20 հազար դոլար:
Կավալենկո Շահգալդյանին է պատկանում «Առկոմպոզիտ» ՍՊԸ-ի բաժնետոմսերի 40 տոկոսը, սակայն այնտեղից ստացած վերջին մեկ տարվա եկամուտը մարզպետը չի հայտարարագրել:
Մեկնաբանություններ (10)
Մեկնաբանել