Ղազախստանում մահացած են հայտնաբերել Ազգային անվտանգության կոմիտեի գնդապետի և ՆԳՆ գեներալի
Ղազախստանի ազգային անվտանգության կոմիտեի (ԱԱԿ) գնդապետ Ազամատ Իբրաևը մահացած է հայտնաբերվել Նուր-Սուլթանի իր տան բակում։ Այդ մասին հայտնում է ԱԱԿ մամուլի ծառայությունը։
Իբրաևի մարմինը գտել են հունվարի 10-ի առավոտյան։ Նա ունեցել է վնասվածքներ, որոնք բնորոշ են բարձր տեղից ընկնելուն, գրում է РИА Новости-ն։ Ենթադրվում է, որ Իբրաևը ինքնասպան է եղել։ Իրականացվում է նախադատական հետաքննություն։
Ազամատ Իբրաևը գլխավորում էր Ազգային անվտանգության կոմիտեի տեխնիկական ծառայությունը, իսկ ավելի վաղ ղեկավարել է գերատեսչության սեփական անվտանգության դեպարտամենտը։
Ղազախստանի հարավում գտնվող Տարազ քաղաքում էլ մահացած է հայտնաբերվել Ժամբիլի մարզի ոստիկանության դեպարտամենտի պետ, գեներալ Ժանատ Սուլեյմանովը։ Интерфакс-ը գրում է, որ վերջինս դարձյալ ինքնասպան է եղել։
Ղազախաստանցի լրագրող Միխայիլ Կոզաչկովը պնդում է, որ Ղազախստանում բողոքի ցույցերից հետո Սուլեյմանովի նկատմամբ հարուցվել էր քրեական գործ։ «Նրան սպառնում էր տրիբունալը»,- հայտնել է լրագրողը։ Պաշտոնապես քրեական գործի մասին չի հայտարարվել։
Ղազախստանում ավելի վաղ տեղի ունեցող դեպքերի ժամանակագրությունը կարող եք կարդալ «Հետք»-ի առցանց թարմացման մեջ։
Լուսանկարում՝ Ժանատ Սուլեյմանովն է/Ղազախստանի կառավարության մամուլի ծառայություն
Մեկնաբանել