Էստոնիան, Լատվիան և Լիտվան ՆԱՏՕ-ին խնդրել են մեծացնել ռազմական ներկայությունն իրենց տարածքներում
Էստոնիան, Լատվիան և Լիտվան դիմել են ՆԱՏՕ-ին՝ խնդրելով մեծացնել ռազմական ներկայությունը։ Այդ մասին Reuters գործակալությանը տված հարցազրույցում հայտարարել է Էստոնիայի վարչապետ Կայա Կալասը։
Նրա խոսքով՝ ներկայության մեծացումը կարող է «զսպիչ գործոն» լինել Ռուսաստանի համար։
ՆԱՏՕ-ի անանուն դիվանագետը գործակալությանը հայտնել է, որ բալթյան երկրների խնդրանքը կարող է դիտարկվել փետրվարի կեսին՝ դաշինքի անդամ երկրների պաշտպանության նախարարների հանդիպման ժամանակ։
2014 թվականից ՆԱՏՕ-ի անձնակազմը մշտական հիմունքներով գտնվում է բալթյան երկրներում, այն բանից հետո, երբ Ռուսաստանը Ղրիմը միացրեց իր կազմին և զինված հակամարտություն սկսեց Ուկրաինայի արևելքում։ Ներկայումս Լիտվայում, Լատվիայում և Էստոնիայում տեղակայված է ՆԱՏՕ-ի 1000-ական զինծառայող։
Հունվարի 12-ին Բրյուսելում վերջին երկու տարվա մեջ առաջին անգամ կայացել էր Ռուսաստան-ՆԱՏՕ գագաթնաժողովը, որի հիմնական թեման եղել է եվրոպական անվտանգությունը։ Դրա արդյունքում կողմերը հասկացրել են, որ սկզբունքային հարցերի վերաբերյալ իրենց դիրքորոշումները չեն մոտեցել, սակայն հայտարարել են, որ պատրաստ են շարունակել բանակցությունները։
Լուսանկարում՝ Գերմանացի զինծառայողը Լիտվայում/ՆԱՏՕ-ի մամուլի ծառայություն
Մեկնաբանել