Այսօր Օձունում տեղի ունեցավ Հանրապետական կուսակցության նախընտրական քարոզչության վերջին ակորդը:  Ապրիլի 21 –ին Օձուն կատարած նախընտրական իր այցի ժամանակ նախագահ Սերժ Սարգսյանը Օձունի երեխաներին խոստացել էր  մանկական խաղերի համալիր, որն էլ  նախագահի հանձնարարությամբ Օձուն էր ուղարկվել մեկ շաբաթ առաջ: 

Օձունի գյուղապետ և Հանրապետական կուսակցության Օձունի կառույցի ղեկավար Արսեն Տիտանյանը շտապել էր նախագահի կողմից գյուղի երեխաների համար ուղարկված մանկական խաղերը արդյունավետ օգտագործել նախընտրական  քարոզչության նպատակով: 

Մանկական խաղերի համալիրը գյուղապետը տեղադրել էր բավականին անհարմար տեղում` Օձունի մշակույթի պալատի բակում, որտեղ տեղակայված էր թիվ 32/64 ` Օձունի ամենամեծ ընտրատեղամասը:   

Խաղահրապարակում՝ նախագահի կողմից ուղարկված խաղալիքների կողքին գյուղապետի հրահանգով տեղադրված և փուչիկներով զարդարված էր ընտրություններին հանրապետականների «Հավատանք, որ փոխենք» կարգախոսը: Իր բացման խոսքում Արսեն Տիտանյանը հավաքված օձունցիներին մեկ անգամ ևս ազդարարեց, որ խաղահրապարակը երեխաներին նվիրել է նախագահ Սերժ Սարգսյանը:

«Չնայած մի քիչ խնդիրներ ունենք, խաղալիքների տակի նախապատրաստական աշխատանքները թերի է արված, բետոնը  դեռ ամբողջովին չորացած չէ, բայց  մեկ շաբաթից հետո արդեն  ամբողջովին խաղահրապարակը կարող է ծառայել մեր երեխաներին»,- ասաց Արսեն Տիտանյանը:

Խաղահրապարակի համար ընտրված ոչ հարմար տեղն էլ  նա այսպես բացատրեց. «Դե գյուղական համայնքներում տարածքները էդ տեսակ դժվար է գտնել, սրա համար ժամանակ է պետք, երևի ֆինանսական միջոցներ են պետք, որ կարողանանք էդ ամեն ինչը լուծել: էսօրվա պայմաններով այստեղ կշահագործենք, հետո համապատասխան տարածք կտրամադրվի և խաղահրապարակը կտեղափոխվի»:

Խաղահրապարակը ընտրություններին նախաշեմին գյուղացիներին նվիրելու հետ  կապված «Հետքի» հարցին Արսեն Տիտանյանը պատասխանեց. «Չէր կարելի խաղալիքները չօգտագործել մինչև  ունենայինք համապատասխան տարածք:  Երեխեքը թող շահագործեն, երբ համապատասխան տարածքը պատրաստ կլինի, այն կտեղափոխենք»:

Օձունի գյուղապետի կարծիքով, մայիսի 6-ին Օձունում ընտրողների ամենաշատ  քվեները կստանա Հանրապետական կուսակցությունը. «Հանրապետական կուսակցությունը շատ ձայներ կունենա, բայց բոլոր կուսակցություներն էլ ընտրողների հետ աշխատում են և նրանց աշխատանքի արդյունքը կերևա մայիսի 7-ին»:

Արսեն Տիտանյանը  հայտնեց, որ  Հանրապետական կուսակցության իր ղեկավարած  կառույցը ունի 200-ից ավելի անդամներ. «Կազմակերպության գերակշռող կազմը աշխատողներ են»,- ասաց նա: Հարցին, թե ճիշտ է, որ  հանրապետական կուսակցության բոլոր կառույցների  ղեկավարների և գյուղապետերի առջև պլան է դրված համապատասխան ընտրողների քանակ ապահովելը ՀՀԿ-ի օգտին` Արսեն Տիտանյանը  ասաց. «Չէ, մենք պարտավորություն չունենք, մեր աշխատանքի արդյունքը կերևա մայիսի 7-ին: Մեր  ակնկալիքները ձայների 50 տոկոս և ավելին է»:  

Օձունը Լոռու մարզի ամենամոռացված գյուղերից մեկն է:  Այստեղ 1400 հա  վարելահողերից գյուղացիները  այս տարի  մշակել են հազիվ 200-250 հա վարելահողը:  Մոտ 5,5 հազար բնակիչ ունեցող հանրապետության խոշորագույն  գյուղի բնակիչների ստվար մասը չի կարողանում մշակել իր վարելահողերը  և գտնվում է ծայրահեղ աղքատության մեջ: Անբարեկարգ վիճակում են գյուղ մտնող և գյուղամիջյան ճանապարհները: «Ուրեմն ասեմ, հողերի մշակությունը այս տարի ավելացել է մոտ 10 տոկոսով: Ներհամայնքային 2 ճանապարհ ասֆալտապատվել է,  մեկը`  Օձունի եկեղեցի գնացող ճանապարհը, մյուսը` դեպի գյուղի գերեզմաններ գնացող ճանապարհի մի մասը:  Օձունում ասֆալտապատման աշխատանքներ կատարվել է մոտ 40 տարի տարի առաջ: Վերանորոգել ենք գյուղապետարանի տանիքը  և թիվ 1 մանկապարտեզի տանիքը: Գյուղում կոյուղու գծեր է անցկացվել»:  Արսեն Տիտայանը ակնկալում է, որ  2013 թ.-ին Օձունի վարելահողերի 50 տոկոսը կմշակվի: Իսկ  մեծ քանակության աղքատ օձունցիների առկայությունը գյուղապետը պատճառաբանեց. «Դե, գիտեք ինչ կա, դա  ամբողջ հանրապետությունում ամեն տեղ ա»: