![](/static/articles/01/40/11/l-dfGbwp1muS.jpg)
«Չորրորդ ինքնիշխանություն». անբարոյականության շոու
Երեկ՝ Հանրապետության հրապարակում տեղի ունեցած ողբերգությունից րոպեներ անց, ինտերնետային կայքերն ու սոցիալական ցանցերը պարզապես հեղեղվեցին դեպքի տեսանյութերով, լուսանկարներով, ականատեսների վկայություններով:
Իհարկե, պայթյունից հետո ստեղծված իրավիճակը իսկապես սարսափելի էր, սակայն հանրությանը ամենաշատը վրդովեցրել էր այն, որ պայթյունից հետո համերգը սովորականի պես շարունակվեց:
Այն ժամանակ, երբ հարյուրավոր մարդիկ այրվածքներ էին ստացել, բղավում էին, օգնություն կանչում, համերգը վարողը հայտարարում է, թե բան չի եղել, ընդամենը փուչիկ է պայթել: Չնայած այդ փուչիկի պայթյունից առաջացած հրդեհը ինը հարկանի շենքի բարձրություն ուներ:
Ավելին, այսքանից հետո փոխանակ արգելափակոցները հանեին, որպեսզի մարդիկ դեպքի վայրից հեռանային, ուղիղ հակառակն են անում. ուժեղացնում են հսկողությունը. Սերժ Սարգսյանը դեռ ելույթ չէր ունեցել, և այդ մարդիկ պետք էին ելույթին տեսք տալու համար:
Լեյլա Սարիբեկյանն էր այդ ժամանակ մի «հայրենասիրական» երգ երգում, ինչ-որ ծաղրածուներ՝ կատակներ անում: Հենց այրված մարդկանց առջև:
Տեսանյութերից մեկում երևում է, թե ինչպես է մի երիտասարդ փորձում դուրս գալ, նրան թույլ չեն տալիս: Այդ երիտասարդը համառում է, ավելին, պահանջում է, որ արգելափակոցները վերացնեն, որպեսզի մարդիկ գնան, սակայն ապարդյուն: Ավելորդ աղմուկից խուսափելու համար այդ տղային բաց են թողնում:
Ահա այսպիսին ստացվեց մի շոու, որտեղ հազարավոր մարդկանց ստիպողաբար էին բերել՝ զուտ դեկորացիայի համար: Շոու, որը դեռ երկար կհիշվի: Այս ողբերգությունը անբարոյականության, հղփացածության, սեփական անպատժելիության հանրագումարը դարձավ:
Մեկնաբանություններ (4)
Մեկնաբանել