Խորհրդարանը հերթական նիստում առաջին ընթերցմամբ քննարկեց «Քաղաքացիական պայմանագիր» խմբակցության պատգամավոր Հայկ Սարգսյանի հեղինակած «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքում փոփոխություն կատարելու նախագիծը: Փոփոխություններով առաջարկվում է հատուցում ստացող շահառուների կազմում ներառել նաև զոհվածի քրոջը, եղբորը, տատին, պապին և փաստացի ամուսնության մեջ գտնվող զինծառայողի կնոջը, եթե ունեն համատեղ երեխա:

«Ինձ հայտնի է դարձել 16 դեպք, երբ հայրենիքի համար իրենց կյանքը զոհաբերած մեր հայրենակիցները չունեն կին, զավակներ, նաև` ծնողներ, և հատուցում չի տրամադրվել իրենց ընտանիքի որևէ անդամի: Իմ ուսումնասիրությունները ցույց են տալիս, որ բոլոր այս 16 դեպքով մեր զինծառայողներն ունեն հարազատ քույր, տատ և պապ»,- ասաց հիմնական զեկուցողը: Հայկ Սարգսյանի խոսքով` հատուցման գումարը բաշխվելու է հավասարաչափ, եթե զոհվածն ունի երկու հարազատ եղբայր, ապա նրանցից ամեն մեկը հինգ միլիոն դրամ միանվագ գումար է ստանալու, և 100 հազար դրամ յուրաքանչյուր ամիս` 20 տարիների կտրվածքով:

Հիշեցնենք, որ գործող օրենքով շահառու են համարվում զոհված զինծառայողների ծնողները, ամուսինը, երեխաները: Փոփոխություններով առաջարկվում է շահառու դարձնել նաև զոհվածի կնոջը (առանց ամուսնության պետական գրանցման), եթե նրանք ունեն համատեղ զավակ: Իսկ քույրը, եղբայրը, տատը, պապը կարող են համարվել շահառու, եթե նախկինում տվյալ զինծառայողի համար որևէ այլ շահառու հատուցման գումար չի ստացել, այլ կերպ ասած, երբ հիմնական շահառուները համարվում են բացակայող:

«Շահառու չի հանդիսանա համատեղ զավակ ունեցող, սակայն զոհված զինծառայողից ամուսնալուծված անձը»,- ասաց Սարգսյանը` հավելելով, որ զավակը կլինի շահառու:

Նախագծի հարակից զեկուցող, պաշտպանության փոխնախարար Արման Սարգսյանը ներկայացրեց Կառավարության դրական եզրակացությունը` կոչ անելով կողմ քվեարկել նախագծին: