«Expo 2020 Dubai» համաշխարհային ցուցահանդեսում այսօր մեկնարկել է Հայաստանի Ազգային օրը։ Այս մասին ֆեյսբուք իր էջում գրել է էկոնոմիկայի նախարար Վահան Քերոբյանը։

Նա նշել է, որ Ազգային օրվա պաշտոնական բացման իր ելույթում կարեւորել է աշխարհում գիտության, մշակույթի եւ տեխնոլոգիաների զարգացման գործում հայ գիտնականների եւ նորարարների անգնահատելի ներդրումը՝ ներկայացնելով նորարարություններ, որոնք բեկումնային են եղել մարդկության առաջընթացի համար։

«Ընդգծել եմ Հայաստանի գործարար եւ ներդրումային միջավայրի գրավչությունները, առանձնացրել հատկապես տնտեսության այն ոլորտները, որոնք կարող են առավել գրավիչ լինել օտարերկրյա ներդրողների համար։

Հայաստանի մասնակցությունը նման մեծամասշտաբ ցուցահանդեսներին կարեւոր է երկրի ճանաչելիության բարձրացման, նոր համագործակցությունների հաստատման եւ  դիվանագիտական հարաբերությունների ամրապնդման տեսանկյունից»,- գրել է նա։