Մարդու իրավունքների պաշտպանը (ՄԻՊ) Բուլղարիայի Հանրապետության արտաքին գործերի նախարարության աջակցությամբ հրապարակել է իրազեկող տեսանյութ գործատուի նախաձեռնությամբ աշխատանքային պայմանագրի լուծման դեպքերի վերաբերյալ։

Ըստ ՄԻՊ գրասենյակի հաղորդագրության՝ ՀՀ մարդու իրավունքների պաշտպանին հասցեագրվող բողոքները վկայում են, որ աշխատողները հաճախ իրազեկված չեն գործատուի կողմից աշխատանքային պայմանագրի լուծման դեպքերի ու ժամկետների վերաբերյալ։ 2020 թվականի ընթացքում Մարդու իրավունքների պաշտպանին հասցեագրված բողոքների ընդհանուր ուսումնասիրությունը վկայում է, որ շարունակում է արդիական մնալ օրենսդրական պահանջների խախտմամբ անձանց աշխատանքից ազատելու խնդիրը:

ՄԻՊ- գրասենյակը հայտնում է, որ աշխատանքային իրավունքների տեսանկյունից մտահոգության տեղիք է տալիս աշխատանքային օրենսդրության այն դրույթների ոչ ճիշտ մեկնաբանությունն ու կիրառությունը, որոնք վերաբերում են աշխատողին աշխատանքից ազատելու օրենսդրական արգելքներին ու ընթացակարգային երաշխիքներին: