Առողջապահության նախարարությունը պարզաբանում է, թե ինչու է «Արմեդ» համակարգում COVID-19-ի պատճառով արձանագրված մահվան դեպքերի քանակը տարբերվում ՀՀ վիճակագրական կոմիտեի տվյալներից։ Պարզաբանումը ներկայացնում ենք ստորև։

«ՀՀ վիճակագրական կոմիտեի հետ ամփոփվել են 2021 թվականի ընթացքում COVID-19-ի պատճառով արձանագրված մահվան դեպքերը, որոնք ամբողջապես համադրվել են «Արմեդ» համակարգում գրանցված մահվան տվյալների հետ: «Արմեդ» համակարգում 2021 թվականի համար գեներացված է, ընդհանուր առմամբ, 5380 ՀՀ քաղաքացու մահվան տվյալ, իսկ Վիճակագրական կոմիտեում արտացոլված քովիդից մահերը կազմել են 5450: Վիճակագրական կոմիտեի հրապարակած թիվը ներառում է նաև այլ պետություններում COVID-19-ից մահացած և արդարադատության նախարարության քաղաքացիական կացության ակտերի գրանցման գործակալության կողմից գրանցված ՀՀ քաղաքացիների մահվան դեպքերը, որոնք «Արմեդ» հաշվեկշռում չեն կարող արտացոլվել: Հետևաբար, «Արմեդի» և ՀՀ վիճակագրական կոմիտեի թվային տարբերությունը կազմում են այն մահերը, որոնք գրանցվել են արտերկրում»,- նշված է պարզաբանման մեջ:

Հիշեցնենք, որ «Հետքը» անդրադարձել էր հարցին՝ «Ըստ Վիճկոմիտեի` կորոնավիրուսից մահացածների թիվը առնվազն 1000-ով ավելի է, քան ԱՆ-ն հաղորդում է» հոդվածում։