Կառավարությունը համաձայնություն տվեց Լճաշեն բնակավայրի սեփականությունը հանդիսացող շուրջ 51,4 հա հողամասներն ուղիղ վաճառքով օտարել՝ «Արդյունաբերական ջերմոցային համալիր» ներդրումային ծրագիրն իրականացնելու նպատակով։ Որոշումն ընդունվեց գործադիրի փետրվարի 17-ի նիստում։

Որոշման նախագծի հիմնավորմամբ՝ Էդուարդ Օհանյանի կողմից հիմնադրված «Գրին Սոլուշնս» ՍՊ ընկերությունը ցանկություն է հայտնել համայնքում իրականացնել 48 մլն եվրոյին համարժեք դրամի ներդրումային ծրագիր։ Ստեղծվելու են 400-450 նոր աշխատատեղեր։ Նախատեսվում է կառուցել խոշոր արդյունաբերական ջերմոցային համալիր։

Նշենք, որ «Գրին Սոլուշնս» ընկերությունը ստեղծվել է 2021 թ-ի սեպտեմբերի 7-ին։ Միակ բաժնետերը հենց Էդուարդ Օհանյանն է։ Աշտարակցի Էդուարդ Օհանյանը «Էն այ քնսթրաքշն» շինարարական ընկերության 50 % բաժնետեր է, իսկ «Սմարթ էյրլայնզ»-ում 1 %-ն է նրան պատկանում։ Օհանյանը նաև «Բեսթ փրոփերթիս», «Իսթեյթ ինվեսմենթ ընդ դիվիլոփմենթ» և ՊԵԿ նախագահի նախկին տեղակալ Արմեն Սաքապետոյանին պատկանող «Յու էմ ագրո» ընկերություններում տնօրեն է։

Տարածքային կառավարման և ենթակառուցվածքների նախարար Գնել Սանոսյանը նախագծի քննարկման ժամանակ հայտնեց, որ գործարքի արդյունքում համայնքային բյուջե մուտք կարվի 22 մլն դրամ։

«Ծրագիրն ընդհանուր առմամբ իրականացվելու է 115 հա տարածքի վրա և ընդգրկելու է Լճաշեն և Վարսեր բնակավայրերի հողերը։ Ծրագրով նախատեսվում է կառուցել 45 հա ընդհանուր տարածքով ջերմոցային խոշոր համալիր և 2,7 հա մակերեսով արդյունաբերական տնկարան, մյուս տարածքները կծառայեն ենթակառուցվածքների համար։ 60 ամիս է նախատեսված շինաշխատանքների ավարտի համար, այդ ընթացքում 350-400 ժամանակավոր աշխատատեղեր կստեղծվեն, դրանից հետո կլինի 400-ից ավելի մշտական աշխատանք»,- նշեց Սանոսյանը։

Ըստ նախարարի՝ աշխատատեղերի մոտ 75 տոկոսը կանանց համար է նախատեսված։ Ակնկալվում է, որ վերջնական արդյունքում տարեկան մոտ 12 հազար տոննա բանջարեղեն կարտադրվի, որի 80 տոկոսը նախատեսվում է արտահանել։

Ակնկալվում է նաև, որ որոշման նախագծի ընդունումը հնարավորություն կընձեռի հողամասերի արդյունավետ օգտագործման, բանջարային մշակաբույսերի արտադրության, նոր աշխատատեղերի ստեղծման հարցերում, ինչպես նաև կավելացվեն համայնքի բյուջե մուծվող գույքահարկի և հողի հարկի մուտքերը։