Կառավարման փորձագետ Հարություն Մեսրոբյանը երեկվա ընտրությունների արդյունքները համարում է կանխատեսելի, և դեռ 2011թ. դեկտեմբերին հայտարարել էր, որ ՀՀԿ-ն, բնականաբար, մեծամասնություն կկազմի:

Անդրադառնալով շատ քաղաքական ուժերի ու գործիչների այն հայտարարություններին, թե մայիսի 6-ի ընտրությունները դրական առումով տարբերվելու էին մյուս բոլոր ընտրություններից՝ Հարություն Մեսրոբյանն ասաց, որ 1995թ.-ից ի վեր՝ «քանի-քանի ընտրությունների քանի-քանի քաղաքական գործիչներ նման բաներ էին ասում»:

«Ես այդ հարցը դեռ անցյալ տարի էի տվել այդ երազողներին. ո՞րն է այն որակապես նոր հանգամանքը, որը գալիս է ասելու, որ այս ընտրությունները պետք է որակապես փոխված լինեն: Ոչ մեկ այդ որակապես նոր հանգամանքը չէր ասում: Իսկ եթե ոչ մի որակապես նոր հանգամանք չկա, բնական է, որ ընտրությունները նույնը կլինեն»,- ասում է Հարություն Մեսրոբյանը:

1995թ. ներդրվեց այն մեխանիզմը, որը հանգեցրեց «չընտրությունների», և այդ մեխանիզմը ընտրությունից ընտրություն կատարելագործվում է: «Դուք չեք կարող մի այնպիսի ձև գտնել, որ այն կողմի դեմն առնեք, որը ուզում է ընտրությունները շեղել իրական արդյունքներից, որովհետև միշտ շեղողը մի քայլ առաջ է, արձագանքողը՝ պայքարողը, մի քայլ հետ է»,- ասում է Հարություն Մեսրոբյանը:

Նրա համոզմամբ՝ մայիսի 6-ի ընտրությունների արդյունքները միանշանակ կհանգեցնեն Հայաստանից արտագաղթի ուժգնացման, որովհետև հերթական անգամ մարդիկ տեսնում են, որ հույս չկա:

«Հույս չկա՝ շատ պարզ պատճառով: Հայաստանի քաղաքական դաշտը վաղուց՝ որպես քաղաքական դաշտ, գոյություն չունի: Իսկ մենք փորձում ենք հերթական անգամ գոյություն չունեցող քաղաքական դաշտից ինչ-որ բան քաղել: Չի լինի նման բան: Միակ ճանապարհն է ուղղակի գնալ այլընտրանքային ճանապարհով՝ այլընտրանքային կառավարման համակարգ ստեղծելու»,- ասում է Հարություն Մեսրոբյանը:

Նրա խոսքով՝ Հայաստանի ընդդիմության մի մասը պայմանական ընդդիմություն է: Երբ մասնագետը կառավարման իմաստով է դիտարկում գործընթացը, որը տևում է մոտ 20 տարի, տեսնում է, որ դաշտում նույն դեմքերն են:

«Այսինքն՝ ձուկը գլխից է փտում, բայց մաքրում են պոչից: Մեր քաղաքական դաշտը կառավարման իմաստով վաղուց փտել է: Հիմա մեղադրում են ժողովրդին. փտած գլխի պայմաններում մաքրում են պոչից: Ես դա չեմ հասկանում»,- ասում է Հարություն Մեսրոբյանը:

ՀԱԿ առաջնորդ Լևոն Տեր-Պետրոսյանի հրապարակային ելույթի այն հատվածի վերաբերյալ, որ եթե այս իշխանությունը վերարտադրվի, ապա ժողովուրդը պետք է մեղադրի միայն ինքն իրեն, նա նշում է. «Եթե մենք հասարակությանը տալիս ենք ընտրություն վատի ու վատագույնի միջև, ինչո՞ւ ենք հետո մենք մեղադրում այդ հասարակությանը: Ո՞ւմ ընտրի: 20-22 տարի հասարակությունը նույն մարդկանց է տեսնում: Ժողովրդին պետք է ընտրության հնարավորություն: Խոսքը ազնիվ ընտրության մասին չէ, խոսքը անձերի ընտրության մասին է»:

Անդրադառնալով այն տեսակետին, որ ՀԱԿ-ն իր ընտրազանգվածի մեծ մասը կորցրեց նախ ՀՀԿ-ի հետ բանակցելու, ապա ԲՀԿ-ի հետ համագործակցելու պատճառով՝ կառավարման փորձագետն ասաց, որ ՀԱԿ-ի ընտրազանգվածը բաղկացած էր 2 մասից: Մի մասը նրանք էին, ովքեր մոռացել էին, թե ինչ էր կատարվում 90-ականներին, երբ ՀԱԿ-ն իշխանություն էր: Մյուս մասը, որը Հարություն Մեսրոբյանն անվանեց «ՀԱԿ-ի պայմանական զանգված», կողմ չէր որևէ մեկին, այլ դեմ էր գործող իշխանությանը, և հենց այդ մասն էլ հեռացավ ՀԱԿ-ից, երբ տեսավ, որ ՀԱԿ-ը սկսում է հարաբերությունների մեջ մտնել իշխանությունների հետ:

Հակառակ ԲՀԿ-ի կողմից ընտրակաշառք բաժանելու մասին բազմաթիվ տեղեկություներին՝ ըստ մամուլի՝ երեկ Միասնական շտաբում Լևոն Տեր-Պետրոսյանն ասել է, որ ԲՀԿ-ից խախտման մեկ դեպք է հայտնի: Անդրադառնալով սրան՝ Հարություն Մեսրոբյանն ասաց, որ ընտրությունների ընթացքում, որպես կանոն, մեկ խնդիր կա. սեփական գինը բարձրացնել, հետո առևտրի մեջ մտնել:

«Տվյալ պահին քաղաքական գործիչը միշտ խոսում է տվյալ պահի կոնյուկտուրայից, ինքը չի խոսում՝ երկրի ապագան հիմքում դնելով: Եվ քանի որ մեզ մոտ քաղաքական դաշտում ցանկացածի արձագանքը կրում է ընթացիկ պահի իմաստով կոնյուկտուրային նպատակ, հետևապես մեծ իմաստով վերլուծել այդ խոսքերը իմաստ չունի»,- ասում է նա: