Վերջին 13 օրվա ընթացքում Վրաստան է ժամանել 20 000-ից ավելի Ռուսաստանի քաղաքացի։ Այդ մասին հայտարարել է Վրաստանի ՆԳՆ նախարար Վախթանգ Գոմելաուրին։

«2019 թվականի նույն օրերին Վրաստան է ժամանել Ռուսաստանի շուրջ 40 000 քաղաքացի»,- լրագրողներին հայտարարել է վրացի պաշտոնյան։

Նախարարի խոսքով՝ Ռուսաստանի քաղաքացիները Վրաստան են ժամանում Թուրքիայից և Հայաստանից։

«Ռուսաստանի բազմաթիվ քաղաքացիներ Հյուսիսկովկասյան հանրապետություններից են. դաղստանցիներ, չեչեններ, հիմնականում՝ կանայք և երեխաներ, որոնք վերջին օրերին գտնվում էին Թուրքիայում և թռիչքների դադարեցման պատճառով հիմա ավտոբուսներով կազմակերպված ժամանում են Վրաստան և ուղիղ շարժվում դեպի «Լարս»-ի անցակետ»,- նշել է նա։

Վախթանգ Գոմելաուրին հերքել է այն տեղեկությունները, որ ռուսական քաղաքացիների մեծ մասը մնում է Վրաստանում։

«Վերջին օրերին Ռուսաստանի մոտավորապես 3000 քաղաքացի մնացել է Վրաստանում։ Ավելի քան 100 քաղաքացու էլ տարբեր պատճառներով վրացական իշխանությունները չեն թույլատրել մտնել երկիր»,- եզրափակել է Վախթանգ Գոմելաուրին։

Լուսանկարը՝ topcor.ru-ից