«Նաիրի» հրատարակչությունը Դավիթ Գասպարյանի աշխատասիրությամբ լույս է ընծայել Եղիշե Չարենցի «Գիրք մնացորդաց» անտիպ ժառանգությունը (Երևան, 2012, 440 էջ, 500 օրինակ):

Գիրքն ընդգրկում է Ե. Չարենցի նորահայտ անտիպ ժառանգությունը: Հրատարակությունը նպատակ ունի այս հատորով լրացնել մեծ գրողի վերջին տարիների հարուստ վաստակի ցաքուցրիվ էջերը:

Գիրքը բացվում է Դ. Գասպարյանի «Չարենցի ձեռագրերի և հարակից խնդիրների մասին» մուտքի ծավալուն խոսքով: Ժողովածուն բաղկացած է հետևյալ բաժիններից' «Պոեմներ», «Բանաստեղծություններ», «Պաշտոնական գրություններ», «Զանազան գրություններ», «Նամակներ, հեռագրեր», «Մակագրություններ, ընծայագրեր», «Պատառիկներ», «Թարգմանություններ», «Կենսագրական վավերագրեր», «Ծանոթագրություններ, մեկնաբանություններ, բնագրային տարբերություններ»:

Հաջորդում է կազմողի «Անհատականություն և ստեղծագործական ազատություն» ուսումնասիրությունը: Գիրքը փակվում է Չարենցի կյանքի ու ստեղծագործության համառոտ տարեգրությամբ:

«Գիրք մնացորդացը» գիտական հրատարակություն է, որը նվիրվում է Ե. Չարենցի ծննդյան 115-ամյակին և հրատարակվել է պետական պատվերով: