Փոխվարչապետ, տարածքային կառավարման նախարար Արմեն Գեւորգյանն այսօր այցելել է Գեղարքունիքի մարզի Վարդենիսի տարածաշրջան: Նա այցը սկսել է  «ԳեոՊրոՄայնինգԳոլդ» ընկերությունից, որտեղ ներկայացվել են արտադրական հզորությունները, ընթացիկ եւ առաջիկա ծրագրերը: 

Ընկերությունն ավելացրել է արտադրության ծավալները, մասնավորապես` 2011թ. առաջին եռամսյակում, նախորդ տարվա նույն ժամանակահատվածի համեմատ,  ոսկու արտադրությունն ավելացել է 62 տոկոսով` հասնելով մինչեւ 7 831 ունցիայի, արդյունահանումն աճել է 56 տոկոսով, վերամշակման ծավալները` 59 տոկոսով:

Ավելացվել է նաեւ աշխատակիցների թվաքանակը. ընկերությունը ձեռք բերելու ժամանակ այնտեղ աշխատում էր 500 մարդ` միջինը  100-110 հազ. դրամ աշխատավարձով, ներկայումս  աշխատում է 769 մարդ, իսկ միջին աշխատվարձը կազմում է 165 հազ. դրամ: Նշվել է, որ էապես լուծվում է տարածաշրջանում զբաղվածության հարցը, ինչը նաեւ սոցիալական կարեւոր նշանակություն ունի:

Ներկայումս իրականացվում են Սոթքի հանքավայրի տեխնիկական վերազինման եւ վերակառուցման աշխատանքներ:

Ընկերությունը Արարատի ֆաբրիկայի վերակառուցման նախագծի շրջանակում 2011թ. հուլիսին ծրագրում է սկսել վերամշակող նոր գործարանի կառուցումը, որը նախատեսվում է շահագործել 2013թ. առաջին եռամսյակում: Այն հնարավորություն կտա արտադրության ծավալներն ավելացնել ավելի քան 5 անգամ: Նախագծի նախնական բյուջեն 100 միլիոն դոլար է:

Անդրադարձ է եղել նաեւ Սոթքում հանքաքարի մանրացման գործընթացին: Ընկերության ղեկավարությունը հավաստիացրել է, որ հանքանյութի մշակման արտադրական գործընթաց չի իրականացվում, ուստի իրենց գործունեությունը չի կարող հակասել օրենքի պահանջներին: Նրանք խոստացել են, որ համապատասխան փաստաթղթերը կներկայացվեն իրավասու մարմիններին: Ա. Գեւորգյանն առաջարկել է հանքաքարի մանրացման արտադրամասի վերաբերյալ տեղեկատվությունը դարձնել հասանելի եւ քննարկել ոլորտի ՀԿ-ների հետ:

Քննարկվել են ընկերության եւ տարածաշրջանի համայնքների միջեւ համագործակցությանը վերաբերվող հարցեր, մասնավորապես` ընկերության կողմից Սոթք համայնքի գազիֆիկացման աշխատանքների համաֆինանսավորման հնարավորությունը:

Ա. Գեւորգյանը ներկա է եղել նաեւ Վարդենիսի թիվ 4 դպրոցում ռուսաց լեզվի վերազինված, ժամանակակից սարքավորումներով հագեցած դասարանի բացմանը, որին ֆինանսապես աջակցել է «ԳեոՊրոՄայնինգ» ընկերությունը: 

Փոխվարչապետն այցելել է Վարդենիսի վերակառուցվող մշակույթի տուն, որտեղ ներկայացվել է հիմնանորոգման նախագծը:

Մշակույթի տունը նորոգվում է Հայաստանի սոցիալական ներդրումների հիմնադրամի, «ԳեոՊրոՄայնինգ» ընկերության եւ Գեղարքունիքի մարզպետարանի միջեւ 2010թ. ստորագրված տարածաշրջանի սոցիալական զարգացման ոլորտում համագործակցության պայմանագրի շրջանակում: 

Անհրաժեշտ գումարից 127 մլն դրամը հատկացրել է ՀՍՆՀ-ն, 108 մլն դրամը` «ԳեոՊրոՄայնինգ» ընկերությունը, եւս 90 մլն դրամ տրամադրվել է ՀՀ  կառավարության պահուստային ֆոնդից` մարզի առաջնահերթ խնդիրների լուծման ծրագրով: Շինարարական աշխատանքներն արդեն մեկնարկել են:

Փոխվարչապետը ողջունել է համատեղ ծրագրի իրականացումը` այն համարելով միասնական ուժերով խնդիրները լուծելու լավագույն օրինակ: Նա վստահություն է հայտնել, որ ջանքերը համատեղելու, համագործակցված աշխատանքի միջոցով հնարավոր է աստիճանաբար  հասնել համայնքային խնդիրների լուծմանը:

Մարզպետ Մ. Պողոսյանի, Վարդենիսի քաղաքապետ Վ. Խլոյանի հետ քննարկվել են նաեւ համայնքային նշանակության հարցեր: Մասնավորապես անդրադարձ է եղել քաղաքի  ջրամատակարարման եւ ջրահեռացման հարցերին, սեփական եկամուտների հավաքագրման ընթացքին:

Այցի ավարտին Ա. Գեւորգյանը եղել է նաեւ Ակունք գյուղում, ծանոթացել համայնքի մշակույթի տան շենքային պայմաններին: Մարզի առաջնահերթ խնդիրների լուծման ծրագրով մշակույթի տան նորոգման համար հատկացվել է 33,7 մլն դրամ: Փոխվարչապետին տեղեկացրել են, որ շինարարական աշխատանքներն առաջիկայում կմեկնարկեն:

Մարզպետին հանձնարարվել է ուշադրության կենտրոնում պահել ծրագրի ընթացքը:

Տեղում քննարկվել են համայնքի խնդիրներին վերաբերող այլ հարցեր եւս: Այս մասին հայտնում են ՏԿՆ հասարակայնության հետ կապերի բաժնից: