«Հետք»-ը ողջ օրվա ընթացքում առցանց հետևում էր Ուկրաինայում իրադարձությունների զարգացմանը։ Մարտի 24-ի առավոտից կշարունակենք լուսաբանումը։ Հետևեք մեզ «Հետք»-ի կայքում և սոցիալական ցանցերի մեր էջերում։

21:36

Ռոսկոսմոսն այսուհետ գործարքները կկնքի ռուսական ռուբլով։

21:30

«Մարդիկ չեն կարողանում ուղղակի սթրեսային պայմաններում աշխատել»։ Այսպես է ՌԴ տրանսպորտի նախարար Վիտալի Սավելևը մեկնաբանել Միխայիլ Պոլուբոյարինովը հեռանալը «Аэрофлот»-ի ղեկավարի պաշտոնից։

21:06

CNN-ը հայտնում է, որ 800 միլիոն դոլար ծավալով ամերիկյան ռազմական օգնության փաթեթի առաջին խմբերը սկսել են հասնել Ուկրաինա։ Այդ օգնությունը ներառում է Stinger տեսակի 800 շարժական զենիթային համալիր և 100 Switchblade կամիկաձե դրոն։

Միևնույն ժամանակ Գերմանիան պատրաստվում է Ուկրաինային տրամադրել 2000 ձեռքի նռնականետ, իսկ Շվեդիան՝ 5000 միավոր հակատանկային միջոց։

20:55

Ռուսաստանի կենտրոնական բանկի ղեկավար Էլվիրա Նաբիուլինան Ուկրաինայում պատերազմի մեկնարկից անմիջապես հետո փորձել է հրաժարական տալ, սակայն Վլադիմիր Պուտինը չի ստորագրել նրա հրաժարականը։ Այդ մասին հայտնում է Bloomberg-ը՝ հղում անելով իր աղբյուրներին։

20:37

Ուկրաինայի առողջապահության նախարար Վիկտոր Լյաշկոն պնդում է, որ ռուսական զորքերը գնդակոծել են շտապ օգնության 58 մեքենա և սպանել վեց բուժծառայողի։

20:16

Ուկրաինայի նախագահ Վլադիմիր Զելենսկին տեսակապով ելույթ է ունեցել Ֆրանսիայի խորհրդարանի առաջ։ Նա առաջարկել է ստեղծել երաշխիքների նոր համակարգ, որն աշխարհում անվտանգությունը կդարձնի անխախտելի, իսկ պատերազմը՝ անհնարին։

19:47

Իսրայելն արգելափակել է լրտեսական Pegasus ծրագրի վաճառքն Ուկրաինային՝ մտավախություն ունենալով, որ դրանից դժգոհ կլինի Ռուսաստանի ղեկավարությունը։ Այդ մասին հայտնում է The Guardian-ը՝ հղում անելով իր աղբյուրներին։

19:36

Լողի միջազգային ֆեդերացիան (FINA) հեռացրել է ռուսաստանցի և բելառուսցի մարզիկներին Բուդապեշտում կայանալիք ջրային սպորտաձևերի աշխարհի առաջնությունից, որը կայանալու էր 2022 թվականի հունիս-հուլիս ամիսներին։ Ի պատասխան Լողի համառուսական ֆեդերացիան հայտնել է, որ ռուսաստանցի մարզիկներին մինչև տարեվերջ հանում է FINA-ի բոլոր մրցաշարերից։

19:29

Deutsche Welle-ն գրում է, որ Շոյգուն սրտի հետ կապված խնդիրներ ունի, այդ իսկ պատճառով չի երևում հանրային վայրերում։

19:18

Չինաստանը պատրաստ չէ աջակցել G20-ից Ռուսաստանի հեռացմանը՝ ի պատասխան Ուկրաինայում նրա գործողությունների։

Ինչպես հայտնում է Reuters-ը, այդ մասին հայտարարել է Չինաստանի ԱԳ նախարար Վան Վենբինը։

18:48

Արտակարգ իրավիճակ է հայտարարվել ՌԴ Բելգորոդի մարզի Ժուրավլյովկա և Նեխոտեևկա գյուղերում, որտեղ պայթել է ուկրաինական կողմից արձակված արկը։ Այդ մասին հայտարարել է մարզի նահանգապետ Վյաչեսլավ Գլադկովը։

Պատահարի հետևանքով կան տուժածներ, նրանց տրամադրվում է բուժօգնություն։

18:31

Սթիվեն Քինգը դադարեցրել է համագործակցությունը Ռուսաստանի հրատարակչությունների հետ։ «Բիլի Սամերս» վեպը, որի շնորհանդեսը կկայանա ապրիլի 6-ին, կդառնա վերջինը։

18:28

Շրջափակված Մարիուպոլում ոչնչացվել է Արխիպ Կուինջիի անվան գեղարվեստի թանգարանը։ Քաղաքային խորհուրդը նշում է, որ շենքը ռմբակոծել են ռուսական զորքերը։

18:11

Հռոմի Ֆրանցիսկոս պապը ռուսերենով և ուկրաիներենով հակապատերազմական գրառումներ է արել

Попросим у Господа жизни избавить нас от войны. С войной всё потеряно, в войне не бывает победы. Да ниспошлёт Господь Своего Духа и да поможет нам понять, что война – это поражение человечества. #МолимсяВместе #Мир

— Pope Francis (@Pontifex) March 23, 2022

18:05

Պուտինը բանակցություններ է վարել Շոլցի հետ. Կրեմլը կարճ հաղորդագրություն է տարածել

Ուկրաինայի շուրջ իրավիճակի քննարկման ժամանակ ուշադրությունը կենտրոնացվել է խնդրի շուրջ ռուսական և ուկրաինական ներկայացուցիչների միջև ընթացող բանակցությունների վրա։ Վլադիմիր Պուտինը մի շարք նկատառումներ է ներկայացրել այդ բանակցություններում Ռուսաստանի Դաշնության սկզբունքային դիրքորոշումների համատեքստում:

17:59

Պեսկովը մեկնաբանել է Չուբայսի հրաժարականը

«Չուբայսն աշխատանքից ազատվել է սեփական ցանկությամբ։ Թե արդյոք նա հեռացել է Ռուսաստանից, թե ոչ, իր անձնական գործն է»,- РИА Новости-ին հայտարարել է Դմիտրի Պեսկովը։

17:47

Ուկրաինայի անվտանգության ծառայությունը միջազգային հետախուզում է հայտարարել «Россия сегодня» գործակալության գլխավոր տնօրեն Դմիտրի Կիսիլյովի և «Россия 1» հեռուստաընկերության հաղորդավարուհի Օլգա Սկաբեևայի նկատմամբ։

Նրանք կասկածվում են Ուկրաինայի տարածքային ամբողջականության և անձեռնամխելիության դեմ ոտնձգության մեջ։

Ուկրաինայի անվտանգության ծառայության տվյալներով՝ ռուսաստանցի այդ լրագրողները բացահայտ աջակցում են Ուկրաինայի դեմ Ռուսաստանի պատերազմին և կոչ են արել Ուկրաինայի սահմանների փոփոխությանը։

17:34

«Коммерсант»-ը գրում է, որ Չուբայսին երեկ Ստամբուլում են տեսել։

17:33

Ռուսաստանի նախագահի կլիմայի փոփոխության հարցերով խորհրդական Ռուսլան Էդելգերիևը հաստատում է Անատոլի Չուբայսի հրաժարականը։ «Այս որոշումը չի անդրադառնա Ռուսաստանում կլիմայական օրակարգի զարգացման վրա»,- ասել է նա։

17:30

Եվրոպայում գազի գինը հազար խորանարդ մետրի դիմաց բարձրացել է մինչև 1350 դոլարի՝ ռուբլով ռուսական գազի դիմաց վճարումներ կատարելու Պուտինի հայատարարությունից հետո:

Մեկ օր առաջ դա կազմում էր 1077 դոլար։

17:24

Առանց մոբայլ հեռախոսային կապի են մնացել Մարիուպոլը, Վորզելը, Իրպենը, Բուչան, Գոստոմելը և Իզյումը։

17:22

Դմիտրի Պեսկով. «Որոշում է ընդունվել անցկացնելու հատուկ ռազմագործողություն, որպեսզի մեր սահմանների մոտ ոչնչացնենք ողջ Ռուսաստանը, օյ հակառուսաստանը»

17:20

ԱՄՆ նախագահ Ջո Բայդենը հայտարարել է, որ Ռուսաստանի կողմից քիմիական զենքի կիրառումը իրական սպառնալիք է հանդիսանում։

17:17

ՌԴ Դաշնային խորհուրդը հաստատել է Ուկրաինայում «հատուկ գործողության» մասնակիցներին մարտական գործողությունների վետերանի կարգավիճակի տրամադրման օրենքը։

17:02

Ուկրաինան լքել է ավելի քան 3,6 միլիոն մարդ

Պատերազմի մեկնարկից մեկ ամիս անց, ՄԱԿ-ի տվյալներով, փախստականների թիվն անցել է 3,6 միլիոնը։

Շուրջ 1,5 միլիոնը երեխաներ են։ 

Փախստականների մեծ մասը մեկնել են Լեհաստան (շուրջ 2,1 միլիոն), Ռումինիա (555 հազար) և Մոլդովա (371 հազար)։

16:51

Մարդու իրավունքների եվրոպական դատարանը հայտարարել է, որ Ռուսաստանը կդադարի 2022 թվականի սեպտեմբերի 16-ից լինել Մարդու իրավունքների պաշտպանության կոնվենցիայի կողմ։ Այսինքն, Եվրոպայի խորհրդի կազմից Ռուսաստանի դուրս գալուց վեց ամիս անց։

16:48

⚡️Բելառուսը որոշել է Բրեստում փակել ուկրաինական հյուպատոսությունը։

Մինսկում ուկրաինական դեսպանությունը կշարունակի գործել 1+4 ձևաչափով, այսինքն դեսպան և չորս աշխատակից։

16:44

Պուտինը հայտարարել է, որ Ռուսաստանն առաջիկայում «ոչ բարեկամական երկրների» համար գազի մատակարարումների վճարումները կդարձնի ռուբլով։

Գազի գնորդները ռուբլի ձեռք կբերեն ներքին շուկայում։ Ենթադրվում է, որ դա կսատարի ռուսական տարադրամին։

16:30

Ուկրաինայի նախագահ Վլադիմիր Զելենսկին դիմել է Ճապոնիայի քաղաքական գործիչներին և ժողովրդին

Նա մասնավորապես, նշել է, որ Ճապոնիան դարձել է Ասիայի առաջին երկիրը, որը պատժամիջոցներէ սահմանել Ռուսաստանի դեմ՝ Ուկրաինա ներխուժելու համար։ Զելենսկին Ճապոնիային կոչ է արել միավորել Ասիայի իր գործընկեր երկրների ջանքերը, որպեսզի կայունանա իրավիճակը և «Ռուսաստանը խաղաղություն փնտրի ու կանգնեցնի Ուկրաինայում իր կոպիտ ներխուժման ցունամը»։

16:21

Նախորդ հանգստյան օրերին Չուբայսն իր տեսակետն էր արտահայտել տեղի ունեցող իրադարձությունների վերաբերյալ։

16:14

Անատոլի Չուբայսը հեռացել է ՌԴ նախագահի կայուն զարգացման հարցերով հատուկ ներկայացուցչի պաշտոնից և հեռացել Ռուսաստանից։ Այդ մասին հայտնում է Bloomberg-ը՝ հղում անելով իրազեկ երկու աղբյուրների։ 

Չուբայսի հեռացումը հաստատել են նաև TACC-ի աղբյուրները։

15:56

Nestlé-ն ռուսական շուկայից հանում է KitKat և Nesquik ապրանքանիշները։ Այդ մասին նշվում է ընկերության հայտարարության մեջ։

Բացի շոկոլադից և կակաոյից, ռուսական շուկայից դուրս կգան նաև մյուս ապրանքանիշները, որոնք պատկանում են Nestlé-ին։ Թե որոնք են դրանք, դեռևս հայտնի չէ։

Nestlé-ն նախկինում քննադատության էր ենթարկվում նրա համար, որ ի տարբերություն մյուս ընկերությունների, դուրս չէր գալիս ռուսական շուկայից։

15:49

Այսօր Ալեքսանդր Նևզորովը բաց նամակ է հրապարակել ՌԴ ՔԿ նախագահ Ալեքսանդր Բաստրիկին, որտեղ առաջարկել է «փակել այս անհեթեթ գործը» և փորձել բացատրել, թե ինչու ՔԿ-ն պետք է հենց այդպես գործի։

15:34

Ավերված Մարիուպոլը երկնքից։

15:23

Ռուսաստանը փոխադարձության սկզբունքով որոշում կընդունի Ռուսաստանից արտաքսել լեհ դիվանագետներին։ Այդ մասին հայտնում է Լեհաստանում Ռուսաստանի դեսպանը։

Հիշեցնենք, ավելի վաղ, Լեհաստանը կազմել էր լրտեսության մեջ կասկածվող ռուսաստանցի 45 դիվանագետների ցանկը և պահանջել նրանց լքել Լեհաստանը։

15:08

Եվրամիությունը հաստատել է Ուկրաինայի հետ համաձայնագիրը, որով Կիևին կփոխանցվի գաղտնի տեղեկատվություն, այդ թվում արբանյակային լուսանկարներ, հայտնում է Bloomberg գործակալությունը։

Այն կկնքվի մեկ տարով և հնարավոր կլինի երկարաձգել։

14:56

Պատերազմի մեկ ամսվա ընթացքում հակապատերազմական բողոքի ցույցերի ժամանակ բերման է ենթարկվել ավելի քան 15 000 մարդ։

14:35

Պարբերաբար հրթիռակոծվում են նաև Ուկրաինայի մյուս քաղաքները։ Այսպես, Ինգուլսկի շրջանի Նիկոլաևա բնակավայրում մարտի 22-ին հրթիռակոծության հետևանքով ուժեղ հրդեհ է առաջացել պահեստներից մեկում։

14:28

ՌԴ ՊՆ հերթական ճեպազրույցը.

• Ռուսաստանցի զինծառայողները մարտեր են վարում Նովոմիխայլովկա բնակավայրի համար։
• «ԴԺՀ» ուժերը վերահսկողության տակ են վերցրել Վերխնետորեցկոյեն և Նովոբախմուտովկան։
• Վերջին մեկ օրվա ընթացքում հրթիռային հարվածներ են հասցվել Ուկրաինայի ռազմական ենթակառուցվածքների 97 օբյեկտների։
• Ոչնչացվել է Ռովնո քաղաքից 14 կիլոմետր հյուսիս-արևմուտք գտնվող Օրժև բնակավայրի զինամթերքի պահուստը, որտեղ գտնվում էր նաև ուկրաինական զինտեխնիկա, այդ թվում արևմտյան երկրներից ստացված։
• Մեկ օրվա ընթացքում ռուսական ՀՕՊ միջոցները օդում խոցել են 1 Су-24 և 16 անօդաչու, այդ թվում 3 Bayraktar TB-2։
• Պատերազմի մեկնարկից հետո ոչնչացվել է 184 ինքնաթիռ և ուղղաթիռ, 246 անօդաչու, 189 զենիթահրթիռային համալիր, 1558 տանկ և այլ զրահամեքենա, համազարկային կրակի 156 միավոր, 624 միավոր հրետանի և ականանետ։

14:25

РБК-ն գրում է, որ Սանկտ Պետերբուրգում կայացել է ՌԴ Արևմտյան զինվորական օկրուգի I տանկային բանակի ինժեներական զորքերի փոխհրամանատար Նիկոլայ Օվչարենկոյի թաղման արարողությունը, որն զոհվել էր Ուկրաինայում։

14:16

Լեհաստանի ներքին անվտանգության գործակալությունը կազմել է լրտեսության մեջ կասկածվող 45 ռուսաստանցի դիվանագետների ցանկը և պահանջել նրանց արտաքսումը։ 

14:13

Ուկրաինայի նախագահի գրասենյակի ղեկավարի տեղակալ Կիրիլ Տիմոշենկոն հայտարարել է, որ մարտի 23-ին կգործի բնակիչների տարհանման մարդասիրական 9 միջանցք։

Չորս միջանցք կգործի Կիևի մարզում, երկուական՝ Լուգանսկի և Դոնեցկի մարզերում և մեկը՝ Զապորոժյեում, հայտնում է Hromadske-ն։

14:10

Լուսանկար Կիևի հրթիռակոծության հետևանքնով առաջացած հրդեհից։

14:08

Ռուսաստանն ու Ուկրաինան գերիների երկու փոխանակում են իրականացրել։ Այդ մասին հայտնում է ՌԴ ԱԳՆ-ն։

14:05

Ռուսաստանցի լրագրողները պնդում են, որ Սերգեյ Շոյգուն արդեն 12 օր է չի երևացել լայն հանրությանը։ Առաջինն այդ մասին հայտարարել է «Медиазона»-ի լրագրող Դմիտրի Տրեշանինը։ Վերջին անգամ Շոյգուին ռուսական պետական լրատվական գործակալությունները ցույց են տվել մարտի 11-ին, երբ նա շփվում էր իր թուրք գործընկեր Հուլուսի Աքարի հետ։ Նույն օրը ՌԴ ՊՆ մամուլի ծառայությունը հաղորդագրություն էր տարածել, որ Շոյգուն այցելել է Մանդրիկայի անվան կենտրոնական ռազմակլինիկական հոսպիտալ։

Մարտի 18-ին էլ Կրեմլի կայքում հիշատակվում էր, որ Շոյգուն մասնակցել է Անվտանգության խորհրդի նիստին։ Ի դեպ, մարտի 11-ից հետո չի շոշափվել նաև ՌԴ ԶՈւ ԳՇ պետ Վալերի Գերասիմովի անունը։

14:04

Մոսկվա է ժամանել Կարմիր խաչի միջազգային կոմիտեի ղեկավար Պետեր Մաուրերը։

14:01

Ռուսաստանի փոխվարչապետ Ալեքսանդր Նովակը, ելույթ ունենալով Պետդումայում, հայտարարել է, որ ռուսական ածխաջրածինների արտահանման վրա էմբարգոյի սահմանումը կարող է կոլափս առաջացնել միջազգային շուկայում։

«Էներգետիկ ռեսուրսների գների աճը կարող է անկանխատեսելի լինել»,- ասել է Նովակը՝ հավելելով, որ օրինակ, ԱՄՆ-ում ռուսական նավթի արգելքի սահմանումից հետո այդ երկրում վառելիքի գինը թանկացել է 19 %-ով։

13:56

Լատվիայի վարչապետ Կրիշյանիս Կարինշը հայտարարել է, որ, հնարավոր է, եկել է ժամանակը կրճատելու ռուսաստանցիներին տրվող ժամանակավոր կացության քարտերը, գրում է Delfi-ն։

Լատվիայի ՆԳՆ ղեկավար Մարիա Գոլուբևան, իր հերթին, հայտնել է, որ փոփոխություններ են նախապատրաստվում, որոնք թույլ կտան ժամանակավոր կացության քարտ տալ միայն այն ռուսաստանցիներին, որոնք պետք է միանան ընտանիքներին և «ռուսական ռեժիմի կողմից բռնաճնշումների ենթարկման հումանիտար նկատառումներից ելնելով»։

Լատվիայում կացության քարտ անհրաժեշտ է այն պարագայում, եթե մարդը վեցամսյա ժամանակաշրջանում պատրաստվում է այդ երկրի տարածքում մնալ 90 օրից ավելին, հիշեցնում է Delfi-ն։

12:41

Ռուսաստանը դուրս է գալիս Դատախազների միջազգային ասոցիացիայից։

12:38

ՌԴ Պետդուման մեկ նիստում երեք ընթերցմամբ ընդունել է Ուկրաինայում «հատուկ գործողության» մասնակիցներին մարտական գործողությունների վետերանի կարգավիճակ տալու օրենսդրական նախագծին։

12:30

Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը, որը մասնակցում է Ռուսաստանի հետ բանակցություններին, թվիթերյան գրառում է արել, որտեղ կոչ է արել մեծացնել սպառազինությունների մատակարարումներն ու պատժամիջոցները։

«Հարգելի' գործընկերներ։ Չե՞ք ուզում ձեր երազներում տեսնել ուկրաինական սպանված երեխաների մահացած աչքերը և զգալ Մարիուպոլի խանձվածքի հոտը։ Միայն չորս քայլ. ժամանակակից ՀՕՊ, եթե չեք կարող փակել օդը, թևավոր հրթիռներ/ ծանր ռեակտիվ համակարգերի համար սպառազինություն, կոշտ նավթային էմբարգո, ՌԴ նավերի համար նավահանգիստների ամբողջական փակում»,- գրել է նա։

Дорогі партнери! Не хочете бачити у снах мертві очі вбитих 🇺🇦 дітей і відчувати гар з Маріуполя? Лише чотири кроки: сучасна ППО, якщо не можете закрити небо; крилаті ракети/боєприпаси для важких реактивних систем; жорстке нафтове ембарго; тотальне закриття портів для 🇷🇺 кораблів.

— Михайло Подоляк (@Podolyak_M) March 23, 2022

11:54

Մեծ Բրիտանիայի պաշտպանության նախարարությունն Ուկրաինայում առկա իրավիճակի վերաբերյալ

• Ուկրաինայի հյուսիսային հատվածի մարտական գործողությունների գոտում իրավիճակը գրեթե չի փոփոխվել։ Հավանական է, որ հնարավոր հարձակողական գործողության անցկացումից առաջ իրականացվում է վերախմբավորում։
• Ռուսական զորքերը փորձում են արևելքից շրջափակել ուկրաինական զորքերին՝ հյուսիսից շարժվելով Խարկովի կողմից, իսկ հարավից՝ Մարիուպոլի։
• Ռուսական զորքերը նախկինի պես փորձում են շրջանցել Նիկոլաևը՝ ձգտելով շարժվել դեպի Օդեսա։

Latest Defence Intelligence update on the situation in Ukraine - 23 March 2022

Find out more about the UK government's response: https://t.co/PCEfBZMADk

🇺🇦 #StandWithUkraine 🇺🇦 pic.twitter.com/gmDkmzjI7F

— Ministry of Defence 🇬🇧 (@DefenceHQ) March 23, 2022

11:48

Գիշերը հրթիռակոծվել է նաև Սումիի մարզի տարածքը։ Մարզային պետական վարչակազմի ղեկավար Դմիտրի Ժիվիցկին տելեգրամյան իր ալիքում հրապարակել է հրդեհի տեսանյութը, որն սկսվել է Տրոստյանեց քաղաքում։ Ժիվիցկու խոսքով՝ ռուսաստանցի զինծառայողները խանգարում են Ուկրաինայի արտակարգ իրավիճակների պետական ծառայությանը հանգցնելու հրդեհը։

11:42

Կիևի քաղաքային վարչակազմը հայտնել է, որ մարտի 23-ի գիշերն ու վաղ առավոտյան Ուկրաինայի մայրաքաղաքը կրկին հրթիռակոծվել է։ Շենքեր են վնասվել Սվյատոշինի և Շևչենկովի շրջաններում։

Գիշերային հրթիռակոծման հետևանքով հրդեհներ են առաջացել առևտրի կենտրոնում և բնակելի երկու շենքերում։ Հրդեհը վերացվել է, տուժածներ չկան։ Շևչենկովի շրջանի առավոտյան հրթիռակոծման պատճառով այրվել են մի քանի մասնավոր կառույցներ և բազմահարկ շենքեր, տուժել է չորս մարդ։

11:39

ՌԴ Պետդումայում կրկին ստեղծվել է Ռուսաստանի ներքին գործերում օտարերկրյա պետությունների միջամտությա փաստերի հետաքննման հանձնաժողով։ Ինչպես նախորդ գումարման խորհրդարանում, այնպես էլ հիմա կգլխավորի Կոռուպցիայի դեմ հակազդման և անվտանգության հանձնաժողովի ղեկավար Վասիլի Պիսկարյովը։ 

Այստեղ էլ կարելի է ծանոթանալ հանձնաժողովի մյուս անդամներին։

11:35

Ռուսական տելեգրամյան ալիքները գրում են, որ «Միասնական Ռուսաստան» կուսակցության պատգամավորներին արգելվել է լքել Ռուսաստանը՝ առանց խմբակցության ղեկավար Վյաչեսլավ Վոլոդինի համաձայնության։ 

11:33

Հրապարակվել են Մարիուպոլի նոր արբանյակային կադրերը, որը պատերազմի մեկնարկից ի վեր ամեն օր հրթիռակոծվում է։

11:30

Ի՞նչ է կատարվել մարտի 23-ի գիշերը` հակիրճ.

• Ուկրաինայի գլխավոր դատախազությունը հայտնել է, որ պատերազմի մեկնարկից ի վեր զոհվել է 121 երեխա, վիրավորվել՝ 167-ը։
• ԱՄՆ նախագահ Ջո Բայդենը մեկնել է Եվրոպա։ Նա կմասնակցի ՆԱՏՕ-ի գագաթնաժողովին, կհանդիպի G7-ի և Եվրամիության առաջնորդներին։ Այցի գլխավոր թեման Ուկրաինայում պատերազմն է։
• Աշխարհի խոշորագույն էներգետիկ ընկերություններից մեկը՝ TotalEnergies-ը հայտարարել է Ռուսաստանում իր աշխատանքների սահմանափակման մասին։
• Սպիտակ տունը նոր պատժամիջոցներ է հայտարարել Ռուսաստանի դեմ։ WSJ-ի տվյալներով՝ պատժամիջոցների տակ կհայտնվեն Պետդումայի պատգամավորները։
• Նույն օրը Ուկրաինայի նախագահ Վլադիմիր Զելենսկին տեսակապով կմասնակցի ՆԱՏՕ-ի գագաթնաժողովին։
• Siemens ընկերությունը դադարեցրել էր Ռուսական երկաթուղու հետ պայմանագիրը՝ նոր «Սապսաններ»-ի մատակարարման մասով։

Լուսանկարը՝ Adobe Stock-ից