![](/static/articles/14/32/05/l-atKQ2Y1dg2.jpg)
Հրթիռակոծվել է Կրամատորսկի երկաթուղային կայարանը. կա առնվազն 39 զոհ
Կրամատորսկում հրթիռակոծվել է երկաթուղային կայարանը։ «Укрзализныця»-ի կառավարման ղեկավար Ալեքսանդր Կամիշինը հայտարարել է 39 զոհի և ավելի քան 100 վիրավորի մասին։
Ուկրաինական իշխանությունների տվյալներով՝ այդ ժամանակ կայարանում եղել է մի քանի հազար մարդ, որոնք ցանկանում էին տարհանվել։ Ուկրաինայի նախագահ Վլադիմիր Զելենսկին հայտարարել է, որ Կրամատորսկի երկաթուղային կայարանին հարվածը հասցվել է ռուսական կողմից՝ «Точка-У» հրթիռից։ «Ռուսաստանցի դահիճները չեն թողնում իրենց մեթոդները։ Չկարողանալով ուժով և քաջությամբ մեզ դիմակայել մարտի դաշտում՝ նրանք ցինիկաբար ոչնչացնում են քաղաքացիական բնակչությանը»,- գրել է Ուկրաինայի նախագահ Վլադիմիր Զելենսկին։
View this post on Instagram
Կրամատորսկի քաղաքապետ Ալեքսանդր Գոնչարենկոն հայտարարել է, որ Կրամատորսկի հիվանդանոցները չեն կարողանում սպասարկել բոլոր վիրավորներին։ «Կան ծանր վիճակում գտնվող մարդիկ, առանց ձեռք, առանց ոտք։ Նրանց միաժամանակ վիրահատում է 30-40 վիրաբույժ»,- ասել է Գոնչարենկոն։ Նրա գնահատմամբ՝ այդ պահին կայարանում մինչև 4000 մարդ է եղել։
ՌԴ պաշտպանության նախարարությունը հերքել է իր զինված ուժերի կապը երկաթուղային կայարանի հրթիռակոծման հետ։ «Կիևի ազգայնական ռեժիմի ներկայացուցիչների բոլոր հայտարարություններն այն մասին, որ իբր ապրիլի 8-ին Ռուսաստանը «հրթիռային հարձակում» է իրականացրել Կրամատորսկ քաղաքի երկաթուղային կայարանի վրա, սադրանք են և բացարձակ չեն համապատասխանում իրականությանը»,- հայտնել է ռուսական պաշտպանական գերատեսչությունը։
«Точка-У» հրթիռները կիրառում է ուկրաինական բանակը։ Ռուսաստանում դրանք դուրս են բերվել զինանոցից, սակայն կան պահուստներ։
Դեռ մարտի 6-ին The Conflict Intelligence Team-ը հայտնել էր, որ «Точка-У» հրթիռները շարունակում են մնալ ռուսական բանակի զինանոցում, չնայած նրան, որ այդ հրթիռների մեծամասնությունը փոխարինվել է ժամանակակից «Искандер»-ներով։
Մասնավորապես, հետաքննողները փետրվարի 24-ից հետո այդ հրթիռները նկատել էին Բելառուսի տարածքում, որտեղ գտնվում էին ռուսական զորքերը, իսկ հրթիռի կայանը լուսանկարվել էր Մարիուպոլում և Չեռնիգովի մարզում։
Լուսանկարը՝ Herve BAR / AFP / Scanpix / LETA
Մեկնաբանել