Փոխվարչապետ, տարածքային կառավարման նախարար Արմեն Գեւորգյանի մոտ մարզպետների մասնակցությամբ այսօր կայացած հերթական խորհրդակցության ընթացքում ներկայացվել են համայնքների սեփական եկամուտների հավաքագրման 2012թ. առաջին չորս ամիսների ցուցանիշները: Տեղեկացվել է, որ սեփական եկամուտների կատարողականը կազմել է 88,7 տոկոս:

Փոխվարչապետը մարզպետներին հորդորել է ուշադրության կենտրոնում պահել հավաքագրումների գործընթացը` նկատելով, որ վարչարարության կատարելագործմանն ուղղված քայլերը եւ տեղական հարկերի մասին օրենսդրական վերջին նախաձեռնության նպատակը ընթացիկ բյուջեների կատարումն ու նոր ապառքներ չկուտակելն է, ուստի համայնքապետերն առավել հետեւողական պետք է լինեն եկամուտների հավաքագրման հարցում:

Քննարկվել են մարզերի առաջնահերթ խնդիրների լուծման ծրագրի երկրորդ մասի ընթացքին վերաբերող հարցեր: Զեկուցվել է, որ բոլոր մարզերում աշխատանքները լայն թափով կատարվում են համաձայն ժամանակացույցի, կատարողականը կազմում է մոտ 76 տոկոս: Փոխվարչապետը հանձնարարել է մարզպետներին հետեւել ծրագրի ընթացքին եւ իրականացվող աշխատանքների որակին:

Նախատեսվում է իրականացնել նմանատիպ երրորդ ծրագիրը, եւ մարզպետներին հանձնարարվել է ներկայացնել հայտերի նախագծերը: Փոխվարչապետն առաջարկել է նաեւ արդեն կազմել 2013թ. բյուջետային հայտերը:

Քննարկվել են նաեւ Համաշխարհային բանկի եւ «Գյուղական տարածքների տնտեսական զարգացման ԾԻԳ»-ի միջոցներով համայնքներում իրականացվող ծրագրերի ընթացքին առնչվող հարցեր: Մասնավորապես կարեւորվել է համայնքների կողմից համաֆինանսավորման պարտավորությունների ժամանակին կատարումը:

Փոխվարչապետն անդրադարձել է նաեւ ոռոգման ջրամատակարարման խնդրին` մարզպետներին հորդորելով ուշադիր լինել ջրօգտագործումների նկատմամբ, հետեւել, որպեսզի ջրային պաշարներն օգտագործվեն արդյունավետ եւ բացառապես ոռոգման նպատակով, քանի որ ըստ կանխատեսումների` տարին սակավաջուր է լինելու:

Զեկուցվել է հողօգտագործողներին մատչելի գնով պարարտանյութ եւ դիզելային վառելիք տրամադրելու պետական ծրագրերի ընթացքի մասին: Նշվել է, որ դրանք հաջողությամբ իրականացվում են, եւ մինչեւ մայիսի 20-ը պարարտանյութի բաշխումը կավարտվի: Քննարկվել են նաեւ նմանատիպ նոր ծրագրերի իրականացման հետ կապված կազմակերպչական հարցեր:

Անդրադարձ է եղել նաեւ հուլիսի 8-ին, սեպտեմբերի 9-ին եւ սեպտեմբերի 16-ին կայանալիք տեղական ինքնակառավարման մարմինների հերթական ընտրությունների կազմակերպման եւ անցկացման հարցերին: Փոխվարչապետը կարեւորել է օրենսդրությամբ սահմանված բոլոր աշխատանքների պատշաճ մակարդակով կատարումը:

Զեկուցվել է նաեւ մարզերում ինտեգրված սոցիալական ծառայությունների ներդրման եւ միասնական ընդունարանների տեղակայման համար անհրաժեշտ շենքային պայմանների հատկացման գործընթացի մասին: Նշվել է, որ տարածքներ դեռեւս չեն հատկացվել որոշ մարզկենտրոններում: Փոխվարչապետը հանձնարարել է աշխատանքի եւ սոցիալական հարցերի նախարարության հետ համագործակցաբար սեղմ ժամկետներում ավարտին հասցնել գործընթացը:

Մարզպետներին հանձնարարվել է նաեւ մինչ նոր ուսումնական տարվա մեկնարկը հստակեցնել դպրոցներում աշխատավարձի ֆոնդի հետ կապված խնդիրները` հաշվի առնելով Կառավարության որոշմամբ սահմանված ժամաքանակները եւ դրանց հիման վրա հաշվարկված գործակիցները: Հանձնարարվել է նաեւ աջակցություն ցուցաբերել ավարտական եւ միասնական քննությունների կազմակերպման գործընթացին:

Խորհրդակցությանը ներկայացվել է վերլուծություն` համայնքային ծառայողների եւ ՀՈԱԿ-ների աշխատակիցներին եւս սոցիալական փաթեթի ծրագրում ընդգրկելու հնարավորությունների վերաբերյալ: Քննարկվել են նաեւ մի շարք այլ հարցեր:

ՏԿՆ հասարակայնության հետ կապերի բաժին