Ալավերդի քաղաքի Ս. Սարահարթ թաղամասը յուրօրինակ արոտավայր է ծառայում թաղամասի հարևանությամբ գտնվող  Սանահին գյուղի անասունների համար: Սանահին գյուղը Ալավերդու  գյուղական թաղամաս է: Ս.Սարահարթ թաղամասը անցյալ դարի 60-ական թվականներին կառուցվել է Սանահին գյուղի գոմերի տարածքում:

Նախկին իներցիայով սանահնեցիները մշտապես վաղ առավոտյան իրենց կովերն ու ձիերը  հանգիստ արոտ են քշում դեպի Ս. Սարահարթ թաղամաս: Կովերը երեկոյան իրենց արոտը վերջացնելուց հետո հանդարտ քայլերով թաղամասից շարժվում են դեպի Սանահին գյուղ: Ս.Սարահարթ թաղամասի   փողոցները հեղեղված են կովերի և ձիերի թրիքով:     

Սանահին գյուղի անասունները իրենց ողջ օրը անցկացնում են  Ս. Սարահարթի  բնակիչների հետ, նրանց հետ քայլում  են կողք-կողքի, անարգել մտնում եմ սարահարթցիների այգիները, որոճում են ծառերի դեռ չհասած պտուղները, հավաքվում են  թաղամասի կենտրոնական հրապարակում, եթե հարկ են համարում, մուտք են գործում թաղամասի հրապարակին հարող մշակույթի տուն:

Ալավերդու պետական քոլեջի տնօրեն Արամ  Պետրոսյանը  «Հետքին» դժգոհեց Սանահին գյուղի «ուսման ծարավ» կովերից. «Ոնց որ մեկը  դիտավորյալ կովերին դեպի քոլեջ քշելիս լինի: Այ մարդ, թե ինչո՞ւ են դեպի քոլեջ քշում էդ անասուններին, չեմ հասկանում»,- ասաց   քոլեջի տնօրենը: 

Մի խոսքով, Սանահին գյուղի կովերը Ալավերդու Ս.Սարահարթ թաղամասում զգում են ինչպես իրենց տանը: Այսօր՝ վաղ առավոտյան էլ Ս.Սարահարթ թաղամասի 2-րդ զանգվածի բնակիչների համար փորձանք էին դարձել բազմացման շրջանում գտնվող Սանահին գյուղի ձիերը: Սրանք էլ մայիսի 10-ի լույս 11-ի ողջ գիշերը խրխնջալով շրջապտույտ էին անում Ս.Սարահարթի 2/26 և մյուս շենքերում` խաթարելով բնակիչների անդորրը: 

Վաղ առավոտյան ձիերը դեռ չէին հանդարտվում, վազում էին իրար հետևից, թռչում են իրար շալակ, փակում են ընթացող ավտոմեքենաների ճանապարհը, հարձակվում էին   աշխատանքի գնացող պղնձաձուլական գործարանի աշխատողների  ու մյուս բնակիչների վրա:   

«Սանահին գյուղը  իր վարչական տարածքում արդյոք   արոտավայր  ո՞ւնի, թե՞ ոչ»,-հարցին Սանահին գյուղի թաղապետ  Արծրուն Երիցյանը  պատասխանեց. «Ոնց կարող է չունենալ: Լալվարի փեշերից, Աքորվա սարից  սփռվում է մինչև  Ջիլիզա  ճամփեքը»: 

Արծրուն Երիցյանը ասաց նաև, որ  Սանահինը գյուղին կպած արոտավայր ևս ունի: Այդ դեպքում, թե  ինչու են գյուղացիները  իրենց անասուններին արոտի ուղարկում Ս.Սարահարթ թաղամաս,  Արծրուն Երիցյանը պատասխանեց. «Ողղակի չգիտենք ում անասուններն են եղել, վաղը առավոտյան  կպարզենք, կտուգանենք և կարգելենք»: