Մեծ Բրիտանիան ընդլայնել է պատժամիջոցների ցանկը և այնտեղ ներառել ռուսաստանցի ևս 206 գործարարի և քաղաքական գործչի, ինչպես նաև նրանց ընտանիքների անդամներին։ Այդ մասին պարզ է դառնում Մեծ Բրիտանիայի թագավորական գանձապետարանի ֆինանսական պատժամիջոցների իրագործման գրասենյակի տարածած տեղեկագրից։ 

Պատժամիջոցների ցանկում ներառվել է ռուսաստանցի մի քանի խոշոր գործարար, որոնք մինչ այժմ ներառված էին միայն ավստրալական «սև ցուցակում» և խուսափել էին հիմնական իրավասությունների սահմանափակումներից։ Այսպես, ապրիլի 13-ից բրիտանական պատժամիջոցների տակ են հայտնվել ЛУКОЙЛ-ի ղեկավար և գլխավոր բաժնետեր Վագիտ Ալեկպերովը, Система բաժնետիրական ֆինանսական ընկերության հիմնական սեփականատեր Վլադիմիր Եվտուշենկովը, ինչպես նաև Անդրեյ Բոկարյովը։

ЛУКОЙЛ-ի և Система-ի բաժնետոմսերը բրիտանական պատժամիջոցների վերաբերյալ նորություններից դեռ չեն տատանվել։ Նաև չի փոփոխվել МТС ԲԲԸ բաժնետոմսերի դինամիկան, որի խոշորագույն բաժնետերը Система-ն է։ 

Միաժամանակ պատժամիջոցների տակ են հայտնվել մի շարք գործարարներ, որոնք վերջերս ներառվել էին Եվրամիության համանման ցանկում։ Այսպես, Մեծ Բրիտանիան սառեցնում է Ֆարհադ Ահմեդովի, Վլադիմիր Բոգդանովի, Մուսա Բաժաևի, Իգոր Կեսաևի, Սայիդ Կերիմովի, Գրիգորի Բերյոզկինի, Եվգենի Զուբիցկու, Ալեքսանդր Շուլգինի ակտիվները։

Պատժամիջոցների ցանկում ներառված է նաև խոշոր գործարար Պավել Եզուբովը։ Նրա դեմ բրիտանական պատժամիջոցներին որպես պատճառ նշվում է նրա կապը Օլեգ Դերիպասկայի հետ։ 

Պատժամիջոցների տակ է հայտնվել նաև «Ռուսական երկաթուղու» նախկին ղեկավար Վլադիմիր Յակունինը։ 

Պատժամիջոցների ցուցակում են նաև հայտնվել ՌԴ նախագահի օգնական Անդրեյ Ֆուրսենկոն, Ուկրաինայի խորհրդարանի պատգամավոր և «Ընդդիմադիր հարթակ՝ կյանքի համար» կուսակցության համանախագահ Վիկտոր Մեդվեդչուկը, ՌԴ ԱԳ նախարար Սերգեյ Լավրովի կինը՝ Մարիա Լավրովան։

Լուսանկարը՝ EPA-EFE/NEIL HALL