![](/static/articles/14/34/72/l-EzhHLPvldY.jpg)
Ուկրաինայում պատերազմի 51-րդ օրը (առավոտյան ամփոփում)
Արդեն 51-րդ օրն է՝ Ուկրաինայում շարունակվում են պատերազմական գործողությունները։ Ամփոփ այն մասին, թե ինչ է եղել նախորդ գիշերվա ընթացքում։
Ռուսաստանի պաշտպանության նախարարությունն ընդունել է, որ նախօրեին ջրասույզ է եղել «Մոսկվա» հածանավը։
««Մոսկվա» հածանավի՝ դեպի նշանակման նավահանգիստ քարշակման ժամանակ, նավի հիմնակմախքի վնասման պատճառով, որը ստացել էր զինամթերքի պայթելու հետևանքով, նավը կորցրել է կայունությունը (այսինքն ալիքների վրա հավասարակշռության վիճակում վերադառնալու կարողությունը)»,- նշվում է ՌԴ ՊՆ հայտարարության մեջ։ Արդյունքում, նավը ջրասույզ է եղել։
Ավելի վաղ, Ուկրաինայի իշխանությունների ներկայացուցիչները հայտնել էին, որ «Մոսկվա» հածանավը հարձակման է ենթարկվել ուկրաինական «Нептун» հրթիռներով։ Ռուսաստանն այդ հանգամանքը չի ընդունում։
Համաձայն ՌԴ ՊՆ հայտարարության՝ հածանավի անձնակազմը տարհանվել է Սևծովյան նավատորմի մյուս նավերի կողմից։ Զոհերի կամ վիրավորների մասին գերատեսչությունը տվյալներ չի հրապարակել։
«Մոսկվա»-ն ՌԴ ռազմածովային ուժերի սևծովյան նավատորմի գլխավոր նավն էր (ֆլագման) և նույն նավատորմի ամենալավ զինվածը։
Ուկրաինական իշխանությունների վարկածով՝ հենց «Մոսկվա» նավն է եղել այն նավը, որը հարձակվել էր Զմեյնի կղզու վրա և որին ուկրաինացի զինվորականները ոչ ցենզուրային բառերով առաջարկել էին հեռանալ։
Մեծ Բրիտանիայի պաշտպանության նախարարությունը «Մոսկվա» հածանավի մասին
- Ռուսաստանն ընդունել է «Մոսկվա» հածանավի կորուստը, որն ուներ ինչպես հրամանատարական նավի դեր, այնպես էլ կարևոր նշանակություն հակաօդային պաշտպանության հանգույցում։
- Խորհրդային արտադրության նավը ռուսական ռազմածովային նավատորմի «Слава» դասի երեք հածանավերից մեկն էր։ Ի սկզբանե շահագործվելով 1979 թվականին՝ «Մոսկվա»-ն միայն վերջերս էր անցել զանգվածային արդիականացում և շարք վերադարձել 2021 թվականին։
- «Մոսկվա» հածանավը, Ուկրաինա Ռուսաստանի ներխուժումից հետո, իր կարևորությամբ երկրորդ հածանավն էր, որը կորցրել է Ռուսաստանը։ Առաջինը «Սարատով» դեսանտային նավն էր, որը ջրասույց էր եղել մարտի 24-ին։ Հավանաբար, այդ նավերի կորուստները կստիպի Ռուսաստանին վերանայել իր դիրքերը Սև ծովում։
Ջո Բայդենը պատրաստ է անձամբ ժամանել Ուկրաինա
ԱՄՆ նախագահ Ջո Բայդենը լրագրողներին հայտարարել է, որ իր վարչակազմը հիմա որոշում է, թե ամերիկյան կառավարության ներկայացուցիչներից ով պետք է առաջիկայում այցելի Ուկրաինա և այդպիսով ԱՄՆ աջակցությունը հայտնի այդ երկրին։
«Մենք հիմա դա որոշում ենք»,- ասել է Բայդենն ի պատասխան այն հարցին՝ արդյոք Սպիտակ տունը պատրաստվում է Ուկրաինա ուղարկել բարձրաստիճան պաշտոնյայի։
Դրանից հետո լրագրողները Բայդենին հարցրել են, թե ում նա կարող է ուղարկել Կիև։ «Իսկ դուք պատրա՞ստ եք մեկնել»,- հանկարծակի հարցրել է նախագահը։ «Իսկ դուք պատրա՞ստ եք»,- հակադարձել են լրագրողները։ «Այո»,- ասել է Բայդենը և հեռացել դեպի ինքնաթիռը։
Լրագրողների հետ երկխոսության սղագրությունը հայտնվել է նաև Սպիտակ տան կայքում։
Ավելի վաղ, Reuters գործակալության աղբյուրները հայտնել էին, որ Բայդենը և փոխնախագահ Քամալա Հարիսը դժվար թե մեկնեն Կիև, սակայն այդպիսի այցելություն կարող են անել պետքարտուղար Էնթոնի Բլինքենը կամ պաշտպանության նախարար Լլոյդ Օսթինը։
Եվրամիությունը քննարկում է ռուսական նավթի ներկրման արգելքը
Պատժամիջոցների նոր փաթեթի մեջ, որը պատրաստում է ԵՄ-ն, կարող է մտնել ռուսական նավթի ներկրման արգելքը։ Այդ մասին գրում է The New York Times-ը։
Պարբերականի տվյալներով՝ Եվրամիության անդամ երկրներն ավելի մոտ են նրան, որ իրենց մեջ պայմանավորվեն սահմանափակիչ միջոցի ներդրման շուրջ։ Սակայն, ինչպես պնդում է NYT-ն, վերջնական որոշումը կընդունվի միայն Ֆրանսիայում նախագահական ընտրությունների երկրորդ փուլից հետո, որը տեղի կունենա ապրիլի 24-ին։
Խերսոնի մարզում տեղի է ունեցել գերիների փոխանակում
Ապրիլի 15-ի գիշերը Խերսոնի մարզում տեղի է ունեցել գերիների փոխանակում, հայտնում է «Громадське»-ն՝ հղում անելով Ուկրաինայի զինված ուժերի «Հարավ» օպերատիվ հրամանատարության հայտարարությանը։
«Լարված բանակցություններից հետո հաջողվել է պայմանավորվածության հասնել Պոսադ-Պոկրովսկոյե գյուղի շրջանում գերիների փոխանակման շուրջ»,- նշվում է հայտարարության մեջ։ Ռուսաստանցի չորս զինվորականները փոխանակվել են հինգ ուկրաինացի զինվորականների հետ։ Այլ մանրամասներ չեն նշվում։
Կիևը գիշերը հրթիռակոծվել է
Այդ մասին հայտնում են ուկրաինական լրատվամիջոցները և Reuters գործակալությունը։ Ուկրաինայի մայրաքաղաքում և Կիևի մարզում մասնակի խախտվել է էլեկտրամատակարարումը։
Ուկրաինայի զինված ուժերի գլխավոր շտաբը տարածել է առավոտյան տեղեկագիրը
- Հակառակորդը շարունակում է հրթիռահրետանային հարվածներ հասցնել Ուկրաինայի բնակավայրերի ենթակառուցվածքներին։
- Վոլինսկի և Պոլեսկոյեի առանձին ուղղություններով Բելառուսի Հանրապետության զինված ուժերի ստորաբաժանումները Բերստի և Գոմելի մարզերի սահմաններին իրականացնում են ուկրաինա-բելառուսական սահմանի քողարկան խնդիրներ։
- Յուժնոբուգսկի ուղղությամբ հակառակորդը փորձում է ամրացնել դիրքերն, համալրում սպառազինության և ռազմական տեխնիկայի, զինամթերքի և վառելիքաքսուքային նյութերի պաշարները։ Հետախուզություն է իրականացնում անօդաչու թռչող սարքավորումների օգնությամբ։
- Դոնեցկի և Տավրիչեսկի ուղղություններում հակառակորդը հիմնական ջանքերը կենտրոնացնում է Պոպասնայա և Ռուբեժնոյե բնակավայրերի գրավման փորձերի ուղղությամբ։
Ուկրաինայի գլխավոր դատախազություն. պատերազմի մեկնարկից ի վեր զոհվել է 198 երեխա
Ուկրաինայում պատերազմի մեկնարկից ի վեր զոհվել է 198 երեխա, ավելի քան 355-ը՝ վիրավորվել։ Այդ մասին հայտնում է Ուկրաինայի գլխավոր դատախազությունը։
Գերատեսչությունը զգուշացնում է, որ զոհերի և տուժածների ճշգրիտ թվերը դեռևս ճշտում են։ Դատախազներն ամբողջական տվյալներ չունեն մարտական գործողությունների վայրերից, բռնազավթված և ազատագրված տարածքներից։
Ամենաշատ թվով երեխաները տուժել են Դոնեցկի, Կիևի և Խարկովի մարզերում։
Էմանուել Մակրոն. Ռուսաստանը պետք է պատասխանատվություն կրի Ուկրաինայում հանցագործությունների համար
Ֆրանսիայի նախագահ Էմանուել Մակրոնը թվիթերյան իր միկրոբլոգում գրել է, որ հեռախոսազրույց է ունեցել նախագահ Զելենսկու հետ, որպեսզի իր աջակցությունը հայտնի Ուկրաինային։
Մակրոնն ընդգծել է, որ պատերազմի 50 օրվա ընթացքում Ֆրանսիան ուկրաինական բանակին տրամադրել է ավելի քան 100 միլիոն եվրոյի ռազմական տեխնիկա և էլի կտրամադրի։
Բացի այդ, Ֆրանսիան Ուկրաինա կուղարկի հրշեջ 24 և շտապ օգնության 50 մեքենա։
«Ուկրաինայում հրեշավոր հանցագործություններ են իրականացվել։ Մեր փորձագետները տեղում օգնում են ուկրաինական և միջազգային դատական մարմիններին՝ հավաքելու ապացույցներ և գտնելու մեղավորներին։ Ռուսական իշխանությունները պետք է պատասխանատվություն կրեն։ Առանց արդարության խաղաղություն չկա»,- հավելել է Մակրոնը։
Լուսանկարը՝ AP Photo/Efrem Lukatsky
Մեկնաբանել