Մայիսի 11-ին Գավառի Օրհուս կենտրոնում տեղի ունեցավ Սևանա լճի էնդեմիկ ձկնատեսակների պոպուլյացիաների վերականգնման մեկնարկային ծրագրի հանրային քննարկում:

Քննարկման մասնակից, Գավառի և Սևանի ՀԿ ներկայացուցիչներին, ուսանողներին, լրագրողներին ու ոլորտի մասնագետներին Գավառի Օրհուս կենտրոնի համակարգող Լ. Ասոյանը ներկայացրեց ծրագրի մանրամասները, որոնց տեղեկացել էր նախորդ օրը տեղի ունեցած հասարակական լսումների ժամանակ:

Այնուհետև Գեղարքունիքի մարզպետարանի բնապահպանության բաժնի վարիչ Հ. Համբարձումյանը խոսեց հնարավոր բնապահպանական վտանգների մասին:

«Էմի ֆրութ» ՍՊԸ-ի խնդրանքով NC Consulting-ը մշակել է մեկնարկային նախագիծ, որի նպատակը Սևանա լճի տարածքում ցանցավանդակներում իշխանի բազմացման հնարավորությունները ճշտելն է: Երկարաժամկետ հատվածում նպատակը Սևանա լճում մինչև 50.000 տ քանակությամբ ձկան արտադրության հասնելն է:

Առաջին հայացքից տպավորություն այնպիսին է, որ նախաձեռնության հեղինակներին ոչ թե հետաքրքրում են Սևանի էնդեմիկ ձկնատեսակների բնական միջավայրում պահպանությունն ու վերարտադրությունը, այլ լիճը դրանց բուծման մի յուրօրինակ վայր դարձնելը՝ առավելապես տնտեսական շահ հետապնդելով:

Սակայն նախաձեռնության հեղինակները լճում գտնվող ցանցավանդակներում Սևանի իշխանի բուծումը դրական գաղափար են համարում և բնապահպանական, և տնտեսական տեսանկյունից, կարծում են, որ այս կերպ ձկան բազմացման հնարավորությունը Սևանա լճում կընդլայնվի:

Ակտիվ քննարկման արդյունքում եղան շրջակա միջավայրի վրա ազդեցության կանխմանը վերաբերող մի շարք առաջարկություններ: Նշվեց, որ խախտվում են Սևանի մասին օրենքի 10-րդ հոդվածի 1-ին կետը, մասամբ էլ 2-րդ կետի ա) ենթակետը:

Քննարկման մասնակիցները որոշեցին Սևանա լճի էնդեմիկ ձկնատեսակների (գեղարքունի և ամառային իշխան) պոպուլյացիաների վերականգնման մեկնարկային ծրագրի գաղափարին հավանություն տալ, միայն երբ «Էմի Ֆրութը» ՍՊԸ-ն կներկայացնի ՀՀ Գիտությունների ազգային ակադեմիայի բոլոր նեղ մասնագիտացված ինստիտուտների հիմնավորված պաշտոնական գրավոր եզրակացությունները, որոնք այս պահի դրությամբ բացակայում են:

Հաշվի առնելով Սևանի կարևորությունը ամբողջ Հայաստանի համար՝ նրանք նաև համարում են, որ հասարակական լսումներ պետք է անցկացվեն ոչ միայն Սևանի ավազանում, այլև բոլոր մարզերում՝ ընդգրկելով համայն շահագրգիռ հասարակությանը:

Մասնակից ՀԿ-ների ներկայացուցիչները որոշեցին լրամշակել քննարկման ընթացքում նշված առաջարկությունները և դրանց ամբողջ փաթեթը մինչև մայիսի 16-ը ներկայացնել «Էմի Ֆրութ» ՍՊԸ-ին և ԲՆ բնապահպանական փորձաքննություն ՊՈԱԿ-ին:

Գավառի Օրհուս կենտրոնի համակարգող Լիաննա Ասոյանը տեղեկացնում է, որ այն ՀԿ-ները կամ շահագրգիռ քաղաքացիները, ովքեր այս հարցի առնչությամբ ունեն առաջարկներ կամ ուզում են միանալ նշված առաջարկներին, կարող են արձագանքել. ՀՀ Գեղարքունիքի մարզ, ք. Գավառ, Գ. Լուսավորիչ 36, ղեկավար՝ Լիաննա Ասոյան, Մարինե Մազմանյան, հեռ.՝ /374 264/ 6-15-11, /077/ 76 46 41, /094/ 64-24-64 :