Երեկ հայտնի դարձավ, որ իշխանությունը պլանավորել է Գյումրիի ՀՀԿ-ական քաղաքապետ Վարդան Ղուկասյանին այդ պաշտոնում փոխարինել թիվ 34 ընտրատարածքում մեծամասնականով ՀՀԿ-ից առաջադրված թեկնածու Արման Սահակյանով:

Վերջինս մայիսի 6-ի խորհրդարանական ընտրություններում այդ ընտրատարածքում պարտվեց ԲՀԿ-ական Մարտուն Գրիգորյանին: Ըստ Կենտրոնական ընտրական հանձնաժողովի հրապարակած թվերի՝ ՀՀԿ-ն Գյումրիում հավաքել է 24.5 տոկոս ձայն, իսկի ԲՀԿ-ն՝ 44.46 տոկոս: ՀՀԿ-ում նման պարտության թիվ մեկ պատասխանատու համարում են Վարդան Ղուկասյանին:

Գյումրիի քաղաքապետի հերթական ընտրությունները նախատեսված է անցկացնել սեպտեմբերի 9-ին կամ 16-ին: Վարդան Ղուկասյանը ՀՀԿ ցուցակի 76-րդ համարն է, և ինչպես հայտնում են «ՀԺ»-ի հանրապետական աղբյուրները, ենթադրվում է, որ նրան կտանեն խորհրդարան, իսկ Գյումրիում քաղաքապետի արտահերթ ընտրություններ կանցկացնեն:

Ըստ ամենայնի, Սերժ Սարգսյանը որոշել է նախագահական ընտրություններից առաջ իրավիճակն ու մթնոլորտը հանրապետության երկրորդ քաղաքում փոխել և այնտեղ ամրացնել իր դիրքերը: