Վերջին տվյալներով՝ 10 մարդ է զոհվել ամերիկյան Նյու Յորք նահանգի Բուֆալո քաղաքի սուպերմարկետի տարածքում տեղի ունեցած հրաձգության հետևանքով։ Ոստիկանությունը դա համարում է հանցագործություն, որն իրականացվել է ռասսայական ատելության հողի վրա։ BBC-ի փոխանցմամբ՝ դեպքի վայրում ձերբակալվել է 18-ամյա սպիտակամորթ մի երիտասարդ։ Կասկածյալը Փեյթոն Գենդրոնն է, որը նույն նահանգի Քոնքլին քաղաքից է։

Կասկածյալը շաբաթ օրը ցերեկը մտել է սուպերմարկետ և կրակ բացել։ Ոստիկանների խոսքով՝ նա տեսախցիկ է օգտագործել՝ հարձակումն առցանց հեռարձակելու համար։ «Մենք հետաքննում ենք պատահարը՝ որպես ատելության հողի վրա իրականացված հանցագործություն և ռասսայական հողի վրա հիմնված բռնի ծայրահեղականության դեպք»,- Բուֆալոյում տեղի ունեցած մամուլի ասուլիսի ժամանակ հայտարարել է Սթիվեն Բելոնգիան։

Ենթադրվում է, որ կասկածյալը տեղաշարժվել է մի քանի ժամ, որպեսզի հասնի Բուֆալո քաղաքի շրջան, որը հիմնականում բնակեցված է սևամորթներով։ Բուֆալոյի ոստիկանության կոմիսար Ջոզեֆ Գրամալիի խոսքով՝ զոհերի մեծ մասն աֆրոամերիկացիներ են։ Եվս 3 մարդ, բոլորը սուպերմարկետի աշխատակիցներ, վիրավորվել են։ Կենսաթոշակի անցած ոստիկանը, որը սուպերմարկետում պահակ էր աշխատում, փորձել է վնասազերծել հարձակվողին, սակայն սպանվել է։

18-ամյա կասկածյալ Փեյթոն Գենդրոնը։ Լուսանկարը՝ BigDawg/REUTERS

Ոստիկանոթյունը հայտնել է, որ հարձակվողը զինված է եղել բավականին լավ հրացանով, նրա վրա եղել է զրահաբաճկոն և սաղավարտ։ Դեպքի վայր ժամանած լրացուցիչ ուժերի հետ նա փորձել է առճակատման մեջ մտնել, սակայն այնուհետ զենքը ցած է դրել, ձերբակալվել է, իսկ այնուհետ՝ կալանավորվել։

Դատարանը նշանակել է դատաբժշկական փորձաքննություն։ Սպասվում է, որ մի քանի օր անց կասկածյալը կկանգնի դատարանի առաջ՝ առաջին մակարդակի սպանության մեղադրանքով։ Նրան սպառնում է ցմահ ազատազրկում՝ առանց վաղաժամկետ ազատման (Նյու Յորք նահանգում մահապատիժն արգելված է)։

CBS-ի հետ զրույցում ոստիկանության աղբյուրը պատմել է, որ հարձակման ժամանակ տղամարդը ռասսայական բնույթի վիրավորանքներ է հնչեցրել։ «Սա ամենավատ սարսափն է, որին կարող է բախվել ցանկացած համայնք, մենք հիմա տառապում ենք, մենք վրդովված ենք։ Մենք չենք կարող այդ հանցագործին թույլ տալ կիսել մեր համայնքը կամ մեր երկիրը»,- լրագրողներին հայտարարել է Բուֆալոյի քաղաքապետ Բայրոն Բրաունը։

Նկարագրելով հարձակման հետևանքները՝ տեղական Buffalo News պարբերականին մի ոստիկան պատմել է. «Դա նման է սարսափ ֆիլմի, սակայն իրական։ Դա ոնց որ Արմագեդոն լինի»։

I'm on my way to Buffalo to assist with the response to today’s shooting.

My heart breaks for the victims' families and for everyone impacted by this horrific and despicable act of violence.

— Governor Kathy Hochul (@GovKathyHochul) May 14, 2022

Նյու Յորքի նահանգապետ Քեթի Հոուքուլը տեղի ունեցածն անվանել է «բռնության ամոթալի գործողություն»։ 

Բուֆալոյում տեղի ունեցածի մասին զեկուցվել է նաև ԱՄՆ նախագահ Ջո Բայդենին։ «Նախագահը և առաջին տիկինն աղոթում են բոլոր զոհերի և նրանց հարազատների համար»,- նշվում է Սպիտակ տան հայտարարության մեջ։ Ավելի ուշ, Ջո Բայդենը հայտարարել է, որ անհրաժեշտ է պայքարել ներքին ահաբեկչության և ԱՄՆ-ում ռասիզմի դրսևորումների դեմ։

Լուսանկարը՝ Reuters գործակալության